သင်္ကြန်
သင်္ကြန် တဲ့လား ခြောက်သွေ့တိတ်ဆိတ်
ငြိမ်သက် လိုက်ပါဘိ။
ရှေးရှေးတုန်းက သင်္ကြန်
ဟိုနှစ်တုန်းက သင်္ကြန်
ပြီးခဲ့လေသော သင်္ကြန် များက
မြို့တိုင်း၊ ရွာတိုင်း သူ့အတိုင်းအတာနှင့်သူ
စည်ကားပျော်ရွှင်စရာ ကောင်းခဲ့သည်။
သင်္ကြန်
ဒီ သင်္ကြန်ကတော့ ဝမ်းနည်းဖွယ်အတိ။
ကြေကွဲဖွယ်အတိ၊ နာကြီးစရာ အတိမို့
သင်္ကြန်ရေ ဒီနှစ်မှာတော့ တို့တွေ
မပျော်နိုင်သေးပါလေ။ ပျော်စရာကိုက
ပျောက်ဆုံးနေသလိုပါ။
သင်္ကြန် ရေ ကအေးပါတယ်။
သို့သော် ရင်ထဲက အပူကို ဒီနှစ်
အတာသင်္ကြန်ရေက အေးနိုင်မယ် မထင်ပါဘူး။
သူ့မှာအပူ ကိုယ့်မှာအပူ
အများတကာ အပူတွေထဲ
ဒီနှစ်နွေက ပိုပူနေသလိုခံစားရတယ်။
သင်္ကြန် ဆိုသည်က ကျုပ်တို့ မြန်မာလူမျိုးများ
အတွက် သဲသဲလှုပ်၊ သွပ်သွပ်ခါအောင်
အရူးအမူး အပျော်ကြူးသည့် ပွဲတော်ကြီးပ။
ထိုအပျော်တွေ ဒီနှစ် သင်္ကြန် မှာ ဘရိတ်အုပ်
ထားကြသည်။ ကိုယ်ချင်းစာစိတ်လေးတွေ
လူတိုင်းမှာ ရှိကြသည်။
သင်္ကြန်ပွဲတော် ပျော်ပါးဖို့မအောင့်နိုင်သူ အချို့ကတော့
သူတို့ဖာသာ အုပ်စုဖွဲ့ပျော်ကြလေသည်။
ပျော်ကြပါစေ သူတို့လည်း သူတို့ခံယူချက်နှင့်
ဖြစ်သည်။ အပျော်ဆိုတာ လူတိုင်း မက်မော
ကြပေသည်။ တော်၏ မတော်၏ စဉ်းစား
ဆင်ခြင် ပျော်ကြပါစေ။
သင်္ကြန် ဒီနှစ်မှာ တို့တွေ မြိုသိပ်လိုက်ကြမယ်။
နောင်နှစ်မှာ ကဲဖို့ တို့ပြည်သူတွေ ညီရဲ့လားဟေ့။
14-4-2022
သင်္ကြန် အကျနေ့။