အားလုံးမင်္ဂလာပါ။
Home Automation နဲ့ ပါတ်သက်ပြီး ဒီနောက်ပိုင်းရက်မှာ ထိန်းချုပ်တဲ့ စနစ်ကို ဆာဗာကနေမလုပ်ပဲ ကိရိယာတစ်ခုချင်းစီ ကလုပ်နိုင်အောင် program codes လေးတွေ ရေးဖြစ်ပါတယ်။ ဆာဗာအနေနဲ့ ကျွန်တော် Raspberry Pi Model B+ လေးကို အသုံးပြုထားတယ်ဆိုတဲ့ အကြောင်း ရှေ့ပိုစ့်မှာ ဖော်ပြဖူးတယ်ထင်ပါတယ်။ Raspberry Pi ကတော့ ကွန်ပျူတာ အသေးလေးပါပဲ။ နိုင်ငံခြား online shops တွေမှာ ပစ္စည်း ပြတ်တဲ့ အထိ အရောင်းသွက်ခဲ့ဖူးတဲ့ ပစ္စည်းလေးဖြစ်ပါတယ်။
Raspberry Pi တွေကို programming စတင်လေ့လာတဲ့သူတွေ၊ home automation လုပ်သူတွေ၊ robotic projects လုပ်သူတွေအပြင်၊ စက်မှု လုပ်ငန်းတွေမှာ အပြင်အခြား နယ်ပယ်တော်တော်များများမှာ သုံးကြပါတယ်။
ကျွန်တော်ကတော့ ဒီ Raspberry Pi ကို home automation မှာ အသုံးပြုတာပါ။
Raspberry Pi သုံးဖို့တကယ်လိုအပ်လား? - ဒီ Pi ကို ရှိခြင်းအားဖြင့် ကျွန်တော့်အိမ်က အင်တာနက်နဲ့ ချိတ်ထားတဲ့ ပစ္စည်းတွေကို အဝေး တစ်နေရာကနေ ကြည့်နိုင်၊ ထိန်းချုပ် အဖွင့်အပိတ်လုပ်နိုင်ပါတယ်။ network နဲ့ ချိတ်ထားတဲ့ ကိရိယာ တွေကို လိုသလို ထိန်းချုပ်ဖို့ သူ့ထဲမှာ program ရေးထားနိုင်ပါတယ်။ Raspberry Pi က ကွန်ပျူတာ အကြီးတွေလို နေရာမယူ၊ အသံမဆူတာတွေကြောင့် အသုံးပြရတာ အဆင်ပြေလှပါတယ်။
နောက်ဆုံး ဆောက်ဖြစ်ခဲ့တာကတော့ အိမ်ထဲမှာ တပ်ဖို့ temperature sensor လေးဖြစ်ပါတယ်။ ဒီကိရိယာကို ပလတ်ထိုးလိုက်ရင် အိမ်က WiFi လိုင်းနဲ့ချိတ်ဆက်ပြီး အပူချိန်ဒေတာကို network ထဲက နေရနိုင်မှာ ဖြစ်ပါတယ်။ ဒီဒေတာပေါ်မှာ အခြေခံပြီး အခန်းထဲက heater ဖွင့်မလား၊ ပူလွန်းနေရင် aircon ဖွင့်ခိုင်းမလား လိုသလို အသုံးပြုနိုင်မှာ ဖြစ်ပါတယ်။အောက်ပုံကတော့ ကျွန်တော်ဆောက်ဖြစ်တဲ့ online temperature တိုင်းတဲ့ ကိရိယာဖြစ်ပါတယ်။
နောက်တစ်ဆင့်အနေနဲ့ လျှပ်စစ်မီး အဝင် Voltage ဗို့အားကို တိုင်းတဲ့ ကိရိယာဆောက်ဖို့ ဖြစ်ပါတယ်။ ပစ္စည်းကို မှာထားဆဲ မရောက်လာသေးတာမို့ မဆောက်ဖြစ်သေးပါဘူး။ ဒီလို ဗို့အားတိုင်းစနစ် တပ်ဆင်ပြီးရင်တော့ မီးအားနဲတာနဲ့ မော်တာမမောင်းဖို့ အလိုအလျောက် ထိန်းချုပ်လုပ်ဆောင်ပေးသွားနိုင်မှာဖြစ်ပါတယ်။
Home automation ကို နောက်ပိုင်း တော်တော်များများ သုံးလာကြပါပြီ။ သူ့နဲ့ပါတ်သတ်တဲ့ နည်းပညာဟာလဲ ဒီ နှစ်ပိုင်းတွေမှာ အတော်တိုးတက်လာတာကိုတွေ့ရပါတယ်။ အသုံးများတဲ့ protocol ကတော့ MQTT သတင်း အချက်အလက်ပို့စနစ်ဖြစ်ပါတယ်။ network ကရိယာတွေကြား အချက်အလက်ပို့တဲ့ စနစ်ဖြစ်ပါတယ်။ ဒီစနစ်ကို Home Automation အပြင် ပို့ဆောင်ဆက်သွယ်ရေး၊ ကုန်ထုတ်လုပ်ရေး၊ ခရီးသည်ပို့ဆောင်ရေး စတဲ့ အခြားကဏ္ဍတွေမှာလဲ ကျယ်ကျယ်ပြန့်ပြန့်သုံးကြပါတယ်။
ခေါတ်ရဲ့လိုအပ်ချက်ကြောင့် ကျွန်တော်တို့ဟာ အရင်ထက် အလုပ်တွေပိုများလာကြပါတယ်။ ဒါကြောင့် ကျွန်တော်တို့ အချိန်ပိုရဖို့ automation ကို သုံးလာကြရတာဖြစ်ပါတယ်။ ရေမော်တာအလိုအလျောက်ဖွင့်ပေးတာ၊ အဝီစိတွင်းပိတ်ဖို့ ဖွင့်ဖို့ အဝေးကနေလုပ်နိုင်တာ၊ အချိန်မှန် ပန်းပင်တွေကို ရေလှောင်းပေးတာ၊ ညအချိန် လမ်းမီး အလိုအလျောက်ဖွင့်ပိတ်ပေးတာ တွေကို automation စနစ်နဲ့ အချိန်ကုန် သက်သာအောင် လူသက်သာအောင် လုပ်ဆောင်နိုင်ပြီဖြစ်ပါတယ်။ နောက်ဆောက်ဖြစ်တဲ့ ပစ္စည်းလေးတွေရှိရင်လဲ အလျင်းသင့်သလို ထပ်မံရေးသားဖော်ပြပါမယ်။
အားလုံးကျန်းမာ ချမ်းသာကြပါစေ။
30th Jan 2023
Myanmar
