اے عُمرِ رواں
آ پاس میرے
اِک راز کی بات بتانی ہے
اِک خُواب سُنانا ہے تجھ کو
اِک درد کی ٹیس سی دِل میں ہے
اِک رنگ دیکھانا ہے تجھ کو
اے عُمرِ رواں
آ پاس میرے
یہ نیم شبی کی خاموشی
یہ نیند کی پلکیں بوجھل سی
اِک خوف سا دِل و دماغ پر ہے
تنہائی میری چُپکے سے کہے
اے عُمرِ رواں
آ پاس میرے
تجھ سے فقط کہنا ہے مجھے
رفتار کو اپنی دھیما رکھ
اِک شخص سے ملنا ہے مجھ کو
ملنے کی گھڑی جو ٹھہری ہے
دو چار صدی یا اب کے برس
اے عُمرِ رواں
آ پاس میرے
Read next