Kia haal dosto? Iss haftay ka bhi pehla din aur mahinay ke pehlay haftay ka aghaz Alhamdulillah achha raha. Waqt bhi kitni ajeeb cheez hai. Kal tak jis bachpan ki baatein hoti thin, aaj woh yaadon ka hissa ban chuka hai. Umar-e-rafta bhi palak jhapakte hi guzar jati hai. Is liye shayad zindagi ka har din shukar ke saath jeena hi sab se badi hikmat hai.
Mujhe lagta hai is duniya mein sehat se badi koi daulat nahi. Paisa dobara kamaya ja sakta hai, khoya hua samaan wapas aa sakta hai, lekin jab sehat saath chhor de to zindagi ki ranginiyan bhi pheeki lagne lagti hain. Allah Ta'ala se bas itni dua hai ke hamesha rizq-e-halal ata farmaye. Itna zaroor ho ke apni zaruriyat izzat ke saath poori ho jayein aur saath hi kisi aur ke kaam bhi aa sakein. Asal daulat wahi hai jo kisi aur ki muskurahat ka sabab ban jaye.
Aaj shaam Faiz Ahmed Faiz ki mashhoor ghazal sunne ka mauqa mila. Kuch kalam aise hote hain jo jitni baar suno, har martaba naya ehsaas de jate hain. Aur jab Tina Sani ki awaaz usay apni narmi aur lehje se saja de to phir chai ka cup bhi kuch aur hi maza dene lagta hai. Albatta aik baat ka sukoon hai ke cigarette ko chhoray bhi zamana guzar gaya. Kuch aadatein chhor dena hi behtar hota hai.
Aj ka sab se khushgawar surprise Scrobble.life ke pehle consumer rewards thay. Yani sirf frontend ko use karne aur content consume karne par weekly rewards milna waqai aik naya aur dilchasp tajurba hai. Hive ecosystem mein yeh apni qisam ki pehli koshish hai aur khushi ki baat yeh rahi ke is martaba sab se zyada rewards mujhe mile. Agar doosre frontends bhi is tarah ke ideas ko apna lein to yaqeenan Hive par naye users ki amad aur activity dono mein izafa ho sakta hai. Short-form content ke baad yeh aik aur qabil-e-tareef qadam hai jis ki hosla afzai zaroor honi chahiye.
Aaj aik aur baat dil ko lagi. Hum aksar har cheez ko "ghalti" keh kar maaf kar dena chahte hain. Halaanke har kaam ghalti nahi hota. Jo kaam soch samajh kar, kisi ko takleef dene ke irade se kiya jaye, woh sirf ghalti nahi rehta. Woh gunah aur badniyati ban jata hai. Maafi ki qeemat tab hoti hai jab insaan ko apni khata ka sachcha ehsaas ho aur woh us ki islaah chahe.
Aur zindagi ka sab se qeemti tohfa? Mere nazdeek waqt. Jo shakhs apna waqt aap ke naam kar de, aap ki khamoshiyan sun le, mushkil waqt mein aap ke saath khara rahe aur bina kisi gharz ke aap ka sahara ban jaye, us ne aap ko sirf chand ghante nahi diye... us ne apni zindagi ka woh hissa de diya jo kabhi wapas nahi aata. Is liye rishton ko tohfay se nahi, waqt se tolna seekhiye.
Aaj ki guftagu ko isi ehsaas ke saath khatam karta hoon.
Alhamdulillah aik aur din Kay liye. Apni naukri, apni sehat aur har us ne'mat par shukar guzar hoon jo Allah ne ata ki. Duniya mein bohat se qabil log aaj bhi aik mauqe ke muntazir hain. Dua hai ke Allah har mehnat karne wale ke liye rizq ka behtareen darwaza khol de. Ameen.
