Haftay Ki Shaam Aur Kuch Dil Ki Baatein...
Umeed hai aap sab ki weekend ki shaam achi guzri hogi. Kahin ghoom phir aaye honge, doston se mulaqat hui hogi ya phir ghar walon ke saath kuch pursukoon lamhe guzare honge. Jab waqt achha chal raha ho aur chehron par muskurahat ho to waqai zindagi kitni khoobsurat lagti hai. Shayad hum sab ki khwahish bhi bas itni hi hoti hai... sukoon, apne log aur chand khushgawar lamhe.
Crypto market ki taraf nazar dali to Hive ne phir se neeche ka rukh ikhtiyar kar rakha hai. Price dekh kar kabhi kabhi dil zaroor udaas hota hai, lekin doosri taraf development ki raftaar dekh kar umeed phir se zinda ho jati hai. Hivesuite.app naye ideas ke saath aage barh raha hai. Ecency apni daily quests ke zariye users ko sirf active hi nahi rakhta, balki rewards de kar hausla afzai bhi karta hai. Snapie ne naye badges introduce kiye hain jo Snapie Points se hasil kiye ja sakte hain, aur yeh gamification platform ko aur dilchasp bana rahi hai. Scrobble.life bhi apni quests aur aane wale consumer rewards ke saath ek naya tajurba dene ki tayyari mein hai. Kabhi kabhi market se zyada products ki taraqqi par nazar rakhni chahiye. Price aaj nahi to kal badal sakti hai, lekin mazboot bunyaad der tak saath deti hai.
Aj kuch der khayalon ke saath bhi baithna hua. Mujhe lagta hai insaan ki zindagi ka rukh us ke khayalat tay karte hain. Jaisa sochte hain, waisa hi dheere dheere dekhna shuru kar dete hain. Isi liye umeed rakhna bhi ibadat jaisa amal lagta hai.
Hum waqai bohat jald baaz hain. Har baat ka natija foran dekhna chahte hain. Dua bhi karte hain aur phir ghari dekhna shuru kar dete hain ke qubooliyat mein itni dair kyun ho rahi hai. Halaanke parinday subah khaali pait ghar se nikalte hain aur shaam ko rizq lekar laut aate hain. Unhein apne Rab par woh yaqeen hota hai jo hum hisaab kitab mein kho dete hain. Maine apni zindagi mein aik baat zaroor dekhi hai... halaat chahe kitne hi sakht kyun na hon, dua kabhi nahi chhorni chahiye. Kab kis lamhe Allah Ta'ala woh darwaza khol de jis ka hum ne tasawwur bhi na kiya ho, koi nahi jaanta. Waqt badalne mein dair nahi lagti, aur Allah ke faislay hamesha insaan ki soch se wasee hote hain.
Aur aik baat jo zindagi ne baar baar sikhayi hai... log daulat se zyada rawayya yaad rakhte hain. Ho sakta hai aap kisi ko lakhon rupay na de sakein, lekin izzat, narmi aur achha ikhlaq har insaan ke bas ki baat hai. Kabhi kabhi aik meetha jumla saalon ka dard kam kar deta hai aur aik sakht lafz saari umr yaad rehta hai.
Chaliye, itni falsafiyana guftagu ke baad aik latifa bhi ho jaye.
Aik dafa rishtedaron ke ghar gaye. Unhon ne poocha:
"Chai piyoge ya bottle?"
Main ne foran kaha:
"Jab tak chai ban rahi hai... bottle le aaiye."
Ab ghar walay kehte hain ke agli dafa tumhein kahin saath le kar nahi jana!
Zindagi ka aik aur haseen mod tab aata hai jab insaan dheere dheere apne walidain ki baatein samajhna shuru karta hai. Bachpan mein jin baton par behas kiya karte thay, wohi baatein aik din bilkul theek lagne lagti hain. Phir waqt ghoom kar wapas aata hai aur apne bachay wahi sawal hum se poochte hain jo kabhi hum ne apne maa baap se kiye thay. Tab samajh aata hai ke generation gap asal mein fasla nahi, zindagi ka aik daira hai.
Aur haan... jab insaan sach bolna shuru karta hai to us ke gird log bhi badalna shuru ho jate hain. Matlabi log is liye door ho jate hain ke unhein faida nazar nahi aata. Jhoote log is liye ke sach unhein bechain karta hai. Aur munafiq log is liye ke do chehron ke saath zyada dair chalna mushkil ho jata hai. Is liye agar sach ki wajah se kuch log saath chhor dein to udaas mat hoiye. Samajh lijiye zindagi khud safai kar rahi hai.
Aaj ki guftagu ko Wasim Barelvi ke in khoobsurat alfaaz par khatam karta hoon:
«"شام تک صبح کی نظروں سے اتر جاتے ہیں
اتنے سمجھوتوں پہ جیتے ہیں کہ مر جاتے ہیں
اک جدائی کا وہ لمحہ کہ جو مرتا ہی نہیں
لوگ کہتے تھے کہ سب وقت گزر جاتے ہیں
گھر کی گرتی ہوئی دیواریں ہی مجھ سے اچھی
راستہ چلتے ہوئے لوگ ٹھہر جاتے ہیں"»
Wasim Barelvi ne chand ash'aar mein poori zindagi ka falsafa sameta hai. Har samjhota jeet nahi hota, har judaai waqt ke saath khatam nahi hoti, aur har musafir hamesha saath nahi chalta. Shayad isi liye zindagi ka asal hunar yeh hai ke apna kirdar mehfooz rakha jaye, chahe log badalte rahein aur mausam bhi.
