Aj subah chai ka pehla ghoont liya to aik ajeeb sa khayal dimagh mein aaya. Zindagi waqai bohat seedhi si hai, bas hum hi usay mushkil bananay mein PhD kar chukay hain. Har baat ka jawab dena zaroori samajhtay hain, har behas jeetna apni zimmedari aur har ghalat baat ka hisaab lena apna farz.
Phir socha, shayad asal danayi har sawal ka jawab dena nahi, balkay kuch sawalon ko muskurakar guzar janay dena hai.
Aj kal logon ko har baat par faisla sunanay ki jaldi hoti hai. Kisi ko samajhnay se pehle us par label laga diya jata hai. Kisi ki kahani sunay baghair us ka kirdar likh diya jata hai. Aur maze ki baat ye hai ke har shakhs khud ko judge nahi, insaf pasand samajhta hai.
Main ne aik baat zaroor seekhi hai. Har jang larna zaroori nahi hota. Kuch maidan khali chhor dene chahiye. Kyun ke har jeet sukoon nahi deti aur har haar nuqsan bhi nahi hoti. Kabhi kabhi khamoshi woh baat keh jati hai jo lambi taqreeren bhi nahi keh paati.
Insani rawaiyon mein murawwat pehle hi kam ho chuki hai. Agar hum har baat ka jawab bhi usi lehjay mein dene lagain to phir farq kis baat ka reh gaya? Kankar ka jawab kankar se dena aasaan hai, lekin phool ki fitrat bachaye rakhna asal imtihan hai.
Mujhe aksar lagta hai ke insaan ki asli auqaat us waqt samajh aati hai jab us ke paas badla lene ka mauqa ho aur woh maaf karne ka rasta chun le. Ye kamzori nahi, ye woh taqat hai jo har kisi ke hissay mein nahi aati.
Khair, duniya apni raftaar se chalti rahegi. Kuch log samjhenge, kuch ghalat samjhenge aur kuch samajhna hi nahi chahenge. Har darwazay par dastak dena bhi koi aqalmandi nahi. Jahan izzat, sukoon aur apnayat mehsoos ho, bas wahi apni awaaz chhor deni chahiye.
Aur baqi... chai thandi honay se pehle pee leni chahiye aur kuch logon ko samjhanay ki koshish bhi usi ke saath khatam kar deni chahiye. Dono ka maza garam hi achha lagta hai.
Rub Rakha
