Naranasan mo na bang maging estranghero sa isang lugar? Eh ang maglakbay ng hindi mo alam kung saan ka patungo? Mahirap diba?
Mahirap pero masaya lalo na kung kasama mo ang iyong mga barkada at pamilya. Gaya na lamang ng imaheng nasa ibaba, kuha ito sa isang paliguan na aming pinuntahan noon. At marahil totoo nga ang kasabihang, "A picture paints a thousand words." kaya kayo na ang humusga. Charot, kitang-kita naman talaga sa aming mga mukha ang saya at pagkagalak.
Kaya naman naisipan kong samahan si @shikika papunta sa dako roon. Walang kasiguraduhan kung ano ang maaabutan namin sa aming pupuntahan pero handa kaming harapin anuman 'yon lalong-lalo na ako dahil ako ay laging handa. Rover Scout ata to :) Kaya hali na kayo't atin ng simulan ang orasyon...ay este ang panibagong ekspedisyon pala. :)
Naalala niyo bang dinala tayo ni @sunnylife sa Mt. Krakra sa Bulgaria? Malayo noh? Kaya naman muli ko kayong ihahatid pabalik dito sa Pilipinas. Gusto ko sana kayong ipasyal patungong London kaso may sakit pa si kapitan kaya sa susunod na lang. Hehehe ;)
Dinala kami ng aming mga paa sa isang probinsya malapit sa aming lungsod. Kapatagan at mga pananim na kahit anumang oras ay maaari nang anihin ang nakapalibot sa amin. Maganda at sariwa ang hangin sa probinsya- natatanging katangiang hinahanap-hanap ng mga taong nakatira sa lungsod. Malayo ito sa ingay ng mga bumubusinang sasakyan o maging sa mabahong amoy na nagmumula sa mga pabrika. Sa aming paglilibot ay hindi lamang pala ang kapatagan at mga pananim ang yaman nila roon kundi maging ang natatagong ganda rin ng kanilang karagatan. Puting-puti ang mga baybayin (hindi naman lahat), malinis at talaga namang kanilang pinangangalagaan.
Tanong ko lang, bakit puting baybayin ang tawag eh hindi naman ito kulay puti? Kulay dilaw nga eh, color blind na ba ako? Kapalit-palit na ba ang mga mata ko? Bakit? Nyahahaha
Dahil kami'y napagod ay napagpasyahan naming magpahinga muna sa lilim ng isang malaki at lumang barko.
Lumang barko talaga yan di lang halata. Wait, upload ko mas clear na photo. Buti na lang pala nag cap ako kundi starring ang lola nyo Hahaha
Medyo kinakalawang na ito dahil hindi nabigyang pansin ng may-ari. Kalakip ng pagod ay rinig na rinig na rin namin ang mga nagwewelgang mga bulate sa aming mga tiyan. Gutom na pala kami, kaya naman, kainan na. Bigyan ng seafoods yan lol.
Gagawin ko pa sana itong entry sa food photography pero baka wag na lang.
Nang makabawi na ang aming mga katawan mula sa pagod at gutom ay napagdesisyunan naming maglibot muli. Meron kaming nakilala't nakakwentuhan at ayon sa kanya ay wag raw muna naming lisanin ang kanilang probinsya dahil ipagdiriwang nila ang isa sa pinakamalaki, pinaka-engrande at pinakamasayang Beach Festival sa bansa ngayong darating na ika-24,25 at 26 ng Mayo nitong taon. Ang aking tinutukoy ay ang "Sarangani Bay Festival o ang SarBay Fest", inaasahan niya ang aming pagdalo.
Noong nakaraang taon kasi ay na postpone ang selebrasyon dahil sa kasagsagan ng kaguluhan sa Marawi at kahit na malayo ang pinangyarihan ng kaguluhan at halata namang peaceful ang probinsya, mas minabuti pa rin ng kanilang pamunuan na ipagpaliban ito dahil mabuti ng sigurado. Pero ngayon ay tuloy na tuloy na ang probinsya sa selebrasyong ito. Ika nga ng pabebe girls, "Walang makakapigil sa amin." Handang-handa na ang lahat para sa taunang pagdiriwang na ito na dinadaluhan ng libu-libong mga turista, sa loob o labas man ng ating bansa. Malay mo dito mo pala makikilala ang poreber mo HAHAHAHA..
"Nais naming makisaya sa inyo subalit di namin maipapangako ang aming pagdalo dahil pagkatapos dito ay isang panibagong paglalakbay na naman ang aming sisimulan. Wag kang malulungkot kaibigan dahil gagawin namin ang aming makakaya upang makabalik dito." Ito ang mga binitawan kong salita sa bago naming kakilala at naiintindihan niya naman kami. Hangad niya ang kaligtasan ng bawat isa sa amin at nawa'y makarating kami ng ligtas sa dako paroon.
Bukod na pinagpala ang ating bansa dahil biniyayaan ito ng magagandang tanawin. At nakikita kong "Ang Dako Paroon" ni @shikika ay isang napakalaking hakbang upang ating ipakita at ipakilala ang iba pang nakatagong ganda ng Pilipinas. Isa itong pagkakataon upang ipakilala sa mundo ang yaman ng ating bansa; mapa yamang lupa, dagat o maging yamang tao pa yan. Nyahahaha :) Pero maganda ring makakita ng mga tanawin mula sa ibang bansa kaya samahan nyo kami sa dako pa roon.
Ay bago ko malimutan sa probinsya ng Sarangani to mga besh. Partikular na sa resort na pag mamay-ari ng may-ari ng aming school. Mga ilang oras na byahe rin galing Gensan bago nyo mararating ang probinsya.
