Passion or Death? | شوق یا موت؟ (Episode 1)

میری آج کی بلاگ بالخصوص ان نوجوانوں کے لیے ہے جنہیں اپنی جان کی قیمت کا اندازہ نہیں ہے. انہیں لگتا ہے کہ کچھ نہیں ہوتا، جوانی میں موج مستی تو ہونی چاہیے. اس کچھ نہیں ہوتا کے چکر میں بہت کچھ ہو جاتا ہے اور پھر بعد میں پچھتاوے کے سوا کچھ نہیں بچتا.

انجن کی زوردار آواز سنتے ہی قاسم صاحب گویا ہوئے: لو جی آگئے آپ کے برخوردار، ہوا کے گھوڑے پر سوار ہو کر۔ یہ ہیں قاسم صاحب جو ایک نجی کمپنی میں کام کرتے ہیں. یہ اصول پسند باپ ہیں. انہوں نے دن رات محنت کر کے اپنے بیٹے کو پڑھایا لکھایا اور اس قابل بنایا کہ وہ کل کو کسی کا محتاج نا رہ پائے مگر ان کا بیٹا عاصم اپنی ہی خرمستیوں میں مگن رہتا تھا. آج بھی وہ تیز بائیک چلاتا ہوا گھر لوٹا تھا. قاسم صاحب کو اس کی یہ عادت بالکل بھی پسند نہیں تھی. چنانچہ وہ عاصم کے آتے ہی اسے کوسنا شروع ہو گئے.

کیا جی! آپ بھی ہر وقت اس بے چارے کے پیچھے ہی لگے رہتے ہیں. بچہ ہے. یہی تو عمر ہے کھیلنے کودنے کی. یہ ہیں کلثوم صاحبہ قاسم صاحب کی بیگم اور اپنے اکلوتے لاڈلے بیٹے عاصم کی ماں جو ہمیشہ اپنے بیٹے کی طرفدار کرکے اس کو باپ کی ڈانٹ سے بچانے کی فکر میں مبتلا رہتی ہیں.

قاسم صاحب فوراً بولے: میں یوں ہی پیچھے نہیں لگا رہتا. مجھے فکر ہوتی ہے اس کی کہ کہیں یہ اپنی حماقت اور لاپرواہی سے خود کا یا کسی اور کا نقصان نا کر بیٹھے. احتیاط سے بھی تو بائیک چلائی جا سکتی ہے نا. بعد میں پچھتانے سے بہتر ہے کہ پہلے احتیاط کر لی جائے ورنہ جب پانی سر سے گزر جاتا ہے تو کوئی تدبیر کارگر نہیں ہو پاتی.

جنون:

امی! امی! عاصم زور زور سے چلاتا ہوا گھر میں داخل ہوا. اندر آتے ہی وہ سیدھا کچن کی طرف گیا اور بے تابی سے پوچھا: امی جان! آج آپ نے کھانے میں کیا پکایا ہے؟ مجھے تو بہت تیز بھوک لگ رہی ہے. اس کی ماں نے اسے دیکھتے ہی اسکی بلائیں لیں. اسکے ماتھے پر بوسہ دیا. انہیں اس کی ہمیشہ فکر رہتی تھی. آخر کو ان کا کلوتا لاڈلا بیٹا جو تھا. وہ اس کی پسند نا پسند کا بہت زیادہ خیال رکھتی تھیں. اور آج بھی انہوں نے عاصم کی پسند کا کھانا بنایا تھا.

کیا؟ اچار گوشت! واقعی! پھر تو بہت مزہ آئے گا. اپنی فیورٹ ڈش کا نام سن کر ہی عاصم خوشی سے نہال ہو گیا. امی! پھر تو میں ابھی فریش ہو کر آتا ہوں. بس آپ جلدی سے کھانا لگا دیں.

اچھا بیٹا سنو! انہوں نے اسے پیار سے پکارا. جو اپنے کمرے میں جانے کے لیے کچن سے نکل رہا تھا. ان کی آواز سن کر وہ رکا اور سوالیہ نظروں سے انہیں دیکھنے لگا. جی امی! کہیں. کیا بات ہے؟

بیٹا تم جانتے ہو کہ تمہارے ابو کو تمہارا تیز رفتاری سے بائیک چلانا بالکل پسند نہیں ہے. ایسی بات نہیں ہے کہ انہیں تم سے کوئی مسئلہ ہے. بلکہ تمہاری فکر ہوتی ہے. خدانخواستہ کسی حادثے کا شکار ہو گئے تو ہم پر کیا گزرے گی؟ تم بائیک آہستہ کیوں نہیں چلاتے؟ ابھی بھی گھر میں داخل ہوتے وقت تمہارے ابو تمہاری بائیک کی اتنی تیز آواز سن کر غصہ کر رہے تھے. کتنی بار میں نے کہا ہے کہ جب وہ گھر پر ہوا کریں تو بائیک آہستہ چلا کر لیا کرو. کم از کم ان کے سامنے تو مت کرو نا ایسا.

اوہو امی! آپ پھر بائیک پر لیکچر دینا شروع ہو گئی ہیں. وہ اپنی ماں کے سمجھانے پر چڑ سا گیا. ابو کیا کم باتیں سناتے ہیں؟ جو اب آپ بھی مجھ پر برسنا شروع ہو گئی ہیں؟
کلثوم بیگم نے اس کے لہجے کی سختی بھانپتے ہوئے اس کا غصہ ٹھنڈا کرنے کی کوشش کی: پر بیٹا! ہم تو تمہاری بھلائی کے لیے یہ سب کہتے ہیں. اگر تمہیں کوئی چوٹ پہنچے گی تو تم سے زیادہ تکلیف ہمیں ہوگی.

امی آپ لوگ ایک بات کہتے کہتے تھک نہیں جاتے؟ وہ غصے میں پیر پٹختا ہوا اپنے کمرے کی اوڑ چلا گیا اور دروازے کو زور سے بند کیا جس کی آواز قاسم صاحب نے بھی سن لی تھی اور وہ اپنا سر پکڑ کر بیٹھ گئے.

کھانے کی میز پر:

کچھ ہی دیر میں کلثوم بیگم نے کھانا تیار کرکے میز پر سجا دیا اور پھر عاصم کو کھانے کے لیے بلانے گئیں. وہ منہ بسورتا ہوا کھانے کی میز پر آیا. قاسم صاحب پہلے سے میز پر موجود تھے. سب چپ چاپ خاموشی سے کھانا کھا رہے تھے کہ اسی دوران قاسم صاحب نے سکوت کو توڑتے ہوئے اپنی بات شروع کی. دیکھو عاصم بیٹا! ماشاءاللّٰه تم اب بڑے اور سمجھدار آدمی بن چکے ہو. اب میرے سامنے کوئی چھوٹا بچہ نہیں بیٹھا ہوا کہ جسے اس کے فائدے اور نقصان کی باتیں مجھے سمجھانی پڑیں. تم اپنا نفع نقصان بہتر سمجھتے ہو. تمہاری پڑھائی کو مکمل ہوئے بھی ایک سالسے زائد عرصہ ہو چکا ہے. تم نے پچھلے سال کہا تھا کہ تم ابھی لائف انجوائے کرنا چاہتے ہو میں نے تمہاری ماں کے کہنے پر کچھ نہیں کہا، خاموش رہا اور تم نے پورے سال میں جو کچھ کیا اور کہا میں نے ہر بات مانی. تمہیں آزادی چاہیے تھی، ہم نے تمہیں آزادی دی. تمہیں بائیک چاہیے تھی ہم نے وہ بھی لے کر دی تمہیں. تم نے جاب کرنے سے منع کر دیا ہم نے اس پر بھی کچھ نہیں کہا کہ تم بعد میں خود کو سنبھال لو گے. اب ہم تمہاری ساری خواہشات پوری کر چکے ہیں. اب اخلاقی طور پر تو تمہیں چاہیے کہ ہماری بات کی عزت کرتے ہوئے یا تو اپنا کاروبار شروع کر دو یا پھر کوئی جاب ڈھونڈو. میں جانتا ہوں کہ اپنے ذاتی کاروبار کے لیے تمہیں سرمایہ چاہیے ہوگا جو کہ تمہارے پاس نہیں ہے. میں جتنا کماتا ہوں، وہ بھی تمہارے سامنے ہی ہے اور میں یہ ہرگز نہیں چاہتا کہ تم بھی میری والی زندگی گزارو. ہر باپ کی یہی تمنا ہوتی ہے کہ اس کا بیٹا اس سے بہتر زندگی گزارے. اس لیے کوشش کرو، فی الحال کوئی اچھی سی جاب تلاش کر لو اور جب کچھ پیسے جمع ہو جائیں تو اس سے اپنا ایک چھوٹا سا بزنس اسٹارٹ کر لینا، تاکہ تمہاری آگے کی زندگی آسان ہو جائے. ہمارا کیا ہے آج ہیں کل نہیں ہوں گے. اب کل کو تمہاری شادی ہوگی، بچے ہوں گے، ان کو ایک اچھی زندگی دینا، ان کی تعلیم و تربیت کا مناسب انتظام کرنا، یہ سب تمہاری ذمہ داری ہوگی. ایسا نہ ہو کہ تم بھی میری طرح نوکری کے چکر میں دھکے کھاتے رہو، اپنا کاروبار اپنا ہوتا ہے.

موت کی راہ پر:

عاصم پہلے تو خاموشی سے اپنے ابو کی بات سنتا رہا، مگر اس سے زیادہ دیر صبر نہ ہو سکا اور ان کی بات کے درمیان ہی وہ اٹھ کر جانے لگا. کہاں جا رہے ہو؟ وہ بات سنے بغیر جانے لگا تو قاسم صاحب کو یہ بات شدید ناگوار گزری. انہوں نے اس کے اٹھ کر جانے کی اپنی توہین محسوس کی. پھر اس کی طرف سے جواب نا پاکر وہ مزید غصے میں گویا ہوئے: تم نے سنا نہیں؟ کیا پوچھ رہا ہوں میں؟

عاصم پیچھے مڑا تو اس کی آنکھیں غصہ کی وجہ سے سرخ ہو رہی ہیں. ایسا لگ رہا تھا کہ آج وہ اپنے دل کی ساری بھڑاس نکال کر رہے گا. ایسا ہی ہوا. وہ اپنے ابو پر زور سے چلا کر کہنے لگا: آپ لوگوں کا روز روز کا یہ لیکچر سن سن کر پک گیا ہوں میں. یہاں نہیں جاؤ. وہاں نہیں جاؤ. ایسا نا کرو. ویسا نا کرو. اتنی رات کو باہر مت نکلو، وغیرہ وغیرہ. اور کون سی آزادی کی بات کر رہے ہیں آپ؟ میں جب اپنے آس پاس کے لڑکوں کو دیکھتا ہوں تو وہ آدھی آدھی رات تک باہر گھومتے پھرتے ہیں، عیش کر رہے ہوتے ہیں اور ایک آپ ہیں جو ہر وقت روک ٹوک میں لگے رہتے ہیں. آپ نے جو کھٹارہ سی بائیک مجھے لا کر دی ہے، وہ بھی ایک سال پہلے ہی دلائی ہے اور وہ بھی اتنی منت سماجت کے بعد. ورنہ میرے سب دوستوں نے کالج لائف میں ہی بائیک لے لی تھی اور ایک میں تھا جو بسوں اور رکشوں کے دھکے کھاتا ہوا کالج اور یونیورسٹی پہنچتا تھا، اور سب میرا مزاق اڑاتے تھے کہ اس کے والدین اس کو ابھی بھی بچہ سمجھتے ہیں. بائیک دلانے کے بعد بھی آپ نے کب مجھے آزاد چھوڑا ہے؟ جب سے بائیک لی ہے، آس پاس کے پڑوسی تک میرا مزاق اڑاتے ہیں، جب آپ ان کے سامنے مجھے یہ کہتے ہیں کہ بائیک آہستہ چلاؤ. ایسے مت چلاؤ. ایسے مت بیٹھو. سیدھے بیٹھ کر بائیک چلاؤ. ہیلمٹ پہن کر بائیک چلاؤ. کیا میں چھوٹا بچہ ہوں؟ جو آپ مجھے سب کے سامنے ایک بچے کی طرح ٹریٹ کرتے ہیں؟ میں اس سب سے بہت تھک چکا ہوں.

بیٹا! میں نے ہمیشہ تمہارا ہی بھلا چاہا ہے. قاسم صاحب اس کی بات کاٹ کر بولے جو مسلسل بد تمیزی کرتا چلا جا رہا تھا. جس طرح تم بائیک چلاتے ہو، اگر تمہیں کالج لائف میں بائیک دلا دی ہوتی تو تم کب کے اللہ کو پیارے ہو چکے ہوتے یا پھر دو چار ہڈیاں تڑوا کر گھر میں بستر پر پڑے ہوتے.

ٹھیک ہے پھر. آپ اپنی چہیتی بائیک کو اپنے پاس ہی رکھیں. آپ کو وہ زیادہ عزیز ہے. نہیں چاہیے مجھے کچھ بھی رکھیں اپنے پاس. وہ غصے میں بائیک کی چابی کو ٹیبل پر پٹختا ہوا باہر نکل گیا، کیونکہ وہ اب مزید کچھ سننے کے موڈ میں نہیں تھا.

عاصم بیٹا! عاصم بیٹا! کلثوم بیگم اس کے پیچھے آواز دیتی ہوئی اس کی طرف دوڑیں جو کہ کب سے باپ بیٹے کی لڑائی میں خاموش اور ڈری ہوئی بیٹھی تھیں، کیونکہ ہمیشہ لڑائی کے بعد عاصم باہر نکل جاتا تھا اور شامت ان کی آتی تھی. کیونکہ قاسم صاحب اس کے جانے کے بعد اپنی بیوی پر برستے تھے کہ تمہارے لاڈ پیار نے اس کو بگاڑ کر رکھ دیا ہے. اور کرو اس کی خواہشات پوری. اس کے نخرے اٹھاؤ. دیکھ لیا نتیجہ؟ وہ جو کہتا ہے تم پوری کرنے چل پڑتی ہو. میں تو شروع سے ہی ان سب چیزوں کے خلاف تھا. اب بھگتو. آج بھی ان کی شامت آنے والی تھی.
رک جاؤ! قاسم صاحب اپنی بیوی پر چلائے. کوئی ضرورت نہیں ہے اس کے پیچھے جانے کی. عزت و احترام سب بھول گیا ہے تمہارا بیٹا.

میرا بیٹا؟ اس بار کلثوم بھی خاموش نا رہیں وہ جتنا میرا بیٹا ہے، اتنا آپ کا بھی ہے. یہ آپ کی غلطی ہے. آپ اس کو ہر وقت ڈانٹتے رہتے ہیں. کبھی تو نرمی سے بات کیا کریں. آخر کو وہ بچہ ہے، ناسمجھ ہے.

بچہ ہے وہ؟ قاسم صاحب کا بھی پارہ ہائی ہو چکا تھا. وہ زور سے چلاتے ہوئے کہنے لگے: اور کتنی نرمی سے بات کروں؟ تم نے دیکھا نہیں وہ کس لہجہ میں بات کر رہا تھا اپنے باپ سے؟ اس کو باہر کی دنیا کی ہوا لگ گئی ہے. دو چار دن باہر رہے گا، خود عقل ٹھکانے آجائے گی. یہ کہتے ہوئے قاسم صاحب اپنے روم میں چلے گئے اور کلثوم بیگم وہیں کرسی پر بیٹھ گئیں اور اپنے بیٹے کے لیے دعائیں کرنے لگیں. یا اللہ اسکو ہدایت عطاء فرما آمین.

ان کی چھٹی حس انہیں پہلے ہی خبردار کر رہی تھی کہ آج کوئی انہونی ہونے والی ہے. انہیں ڈر تھا کہ کہیں ان کا بیٹا غصے میں کوئی الٹا سیدھا اقدام نہ کر ڈالے. اور پھر خدشے کے عین مطابق ایسا ہی ہوا. ایک ایسا حادثہ جس نے سب کچھ بدل ڈالا. کوئی سوچ بھی نہیں سکتا تھا کہ وہ ایسا کر گزرے گا؟ آخر عاصم نے ایسا کون سا قدم اٹھایا؟ اس کی تفصیل اگلے حصے میں آپ ملاحظہ فرمائیں گے.