sumber gambar
ie, Apui
ie, apui, angen, tanoh
Sinan timoh bandum hamba
Laen Huteuen
Laen huteuen laen cagee
Laen ureueng laen lagee
Laen bungong laen mubee
Laen Dayah laen guree
Laen nanggroe laen adat
Laen gampong laen reusam
Laen krueng laen lingkok
Laen lhok laen buya
Meuka Bak U
Meuka bak U hanjeut bak pineueng
Pajan meutemeung ta ubah teuma
Meunyoe meutem jeuet meu ubah
Hana payah ubat peunawa
Ureueng Yang Han Tueng
Ureueng nyang han tueng bek ta peusak
Ureueng nyang han jak bek ta maba
On Jok
On jok on rambideng
Duek saban-saban hate meu laen-laen
Ok Gob
Ok gob puteh geutanyoe pakoe
Bulee geutiek droe hana takira
Catok Meu Jeulunu
Catok meu jeulunu keunuku bak Ija tumpee
Haba meutungku buet meu keuleudee
Paleh Sie Masiet
Paleh sie masiet han jitem toubat
Paleh sie bangsat han deungoe haba
Bek Tatiek Duroe
Bek tatiek duroe bak rhot uh tajak
Han keunong bak tajak keunong bak tawoe
Peunyaket tabloe utang tapeuna
Langkah
Langkah raseuki peutumuen mawot
Han soe tu'oh rhasiya Allah Kuasa
Malang Hanjeut
Malang hanjeut ta peusie
Raseuki hanjeut ta tulak
Meunyoe Ka Mate
Meunyoe ka mate habeh nyawoeng
Tinggai mantoeng meuhat nama
Panah Han Jiboh
Panah han jiboh geutah
Pisang han jiboh sisi
ie Lam Guci
ie lam guci ta crong ngen ceunu
Pue nyang karue atra kalheuh na
Malem Nahu
Malem nahu le beurakah
Malem pikhah le pegah haba
Meukon ie
Meukon ie, leuhop
Meukon droe bandum gob
Musem Timu
Musem timu ta pot kilat
Musem barat ta koh reubong
Musem timu talaboh pukat
Musem barat tameu lampoh
Meunyoe Troe
Meunyoe troe tumpoe pi klat
Meunyoe deuk pisang beueng jeut keumalakat
Meuri-ri Urot
Meuri-ri urot ta-ikat beunteueng
Meuri-ri ureueng balah guna ma
Beurangkadum
Beurangkadum raya ie krueng
Nyang geubileueng ie Kuala
Beurangkadum buet rakyat
Nyang geubileueng cit buet raja
Meunyoe Got Niet
Meunyoe got niet ngen itikeuet
Geutanyoe gob tueng ji pumulia
Meunyoe brok niet ngen itikeuet
Meurang kahoe pih gob upat
Sumber : Panton Aceh, Razali Abdullah, 2009