အမေ့အတွက် မနက်က ဈေးမှ ဆီချက်ခေါက်ဆွဲ
ဝယ်ခဲ့သည်။ အမေ့က ထမင်းကို အားပြု မစား
တော့ပေ။ ပေါင်မုန့်နှင့် လက်ဘက်ရည်၊ ရှမ်းခေါက်ဆွဲ
ကို ဆီချက်သုတ်လေး သုတ်သည်ကိုကြိုက်သည်။
မုန့်ဟင်းခါးကိုတော့ အနည်းငယ်သာ သောက်သည်။
မုန့်ဟင်းခါး ဆို၍ ထိုအရာကို သောက်သည်၊ စားသည်
ဟု ပြဿနာဖြစ်သေးသည်။ စားစား သောက်သောက်
ပါးစပ်မှ ဗိုက်ထဲဝင်တာချင်း အတူတူပါလေ။
မနက်ခင်းဈေးအသွား ကောင်းကင်ကို မော့အကြည့်မှာ
တိမ်တွေလှပမှုကို ခဏငေးမောကြည့်မိသေးသည်။
မနက်ခင်း ဈေးအသွားမှာ ရပ်ကွက်ရုံ တရုံကို
ဖြတ်သွားရသည်။ ထိုရပ်ကွက်ရုံက အခြားသော
သူများရုံးများနဲ့မတူ ရုံးဘေးနား ပတ်ဝန်းကျင်ကို
နယ်ချဲ့ယူထားသည်။ ထိုရုံးရှေ့မှ လမ်းမကို မကြာခင်မှ
ပြန်ဖွင့်ထားသည်။ ထိုပိတ်ထားသော လမ်းမမှ
ဈေးသို့ သွားပါရင် နီးသည်။ ထိုလမ်း ပိတ်ထားသော
ကြောင့် ဈေးသို့သွားရာတွင် ကွေ့ပတ်သွားရသည်။
ယခုတော့ လမ်းဖွင့် ထား၍ ရပ်ကွက်ရုံးရှေ့မှ
ဖြတ်သန်းပြီး ဈေးသို့သွားရတာ နီးသွားရပေသည်။
သို့ပေသိ ဈေးအသွားမှာသာ ဖြတ်သန်းပြီး ဈေး
အပြန်မှာတော့ ထိုလမ်းမှ မပြန်ပါ။ တက်တိုင်သမျှ
ထိုသို့သော နေရာများမှ ဝေးနိုင်သမျှ ဝေးဝေးမှ
သွားလာသည်က ကောင်းပေသည်။ ယနေ့မနက်ခင်း
ထိုရပ်ကွက်ရုံးမှ ဖြတ်ပြီး ဈေးသို့အသွား ရုံးရှေ့မှာ
ဗီနိုင်းကပ်ထားသည်ကို တွေ့ရသည်။ ရပ်ကွက်ရုံး
ကထိန်ကျင်းပပြီး ဇာတ်ပွဲဖြင့် ဧည့်ခံဖျော်ဖြေ
မည်ဖြစ်သည်။ ဇာတ်ပွဲအမည်က မြို့ရွှေမန်းသားလေး
ဖိုးချစ်ဇာတ်သဘင်ဖြစ်သည်။ ဖိုးချစ် ဇာတ်ပွဲဆို၍
အနည်းငယ်အံ့ဩသွားရသည်။
ကျွန်တော်တို့ မန္တလေးထုံးစံက ဘုရားပွဲ၊ ကထိန်ပွဲများ
မှာ ထိုသို့သော ဇာတ်သဘင်ကြီးများ ကပြသည်မှာ
ရှားပါးသည်။ ပုံမှန်ဆိုပါမူ ရိုးရိုးဇာတ်ပွဲနှင့် မြို့မ
တီးဝိုင်းသာ ဖျော်ဖြေလေ့ရှိကြသည်။
ယခုတော့ ရုံသွင်းပြသသော၊ ဈေးကြီးသော
ဇာတ်ပွဲကို ကပြမည်ဆို၍ အံ့ဩ
မိသွားသည်။ အမကို ပြောပြတော့ မအံ့ဩပါနဲ့။
သူတို့တွေ ငွေတွေ ဘယ်လောက်တောင်များ
ဝင်ကြသလဲဆိုတာ သိလိုက်တော့ဟု ပြောသည်။
သူတို့တွေ အတွက် ဒီခေတ်အခါမှာ ငွေရှာရတာ
အင်မတန်လွယ်နေကြတာကိုး။
ကျွန်တော့်အမ ပြောပြသည်ကလည်း ဟုတ်ပေသည်။
ရပ်ကွက်အလိုက် ပျူးတွေ၊ ဇိုးတွေ၏ တောင်းခံမှုကို
မခံကြရသည့် ရပ်ကွက်ဆိုသည်မှာ မရှိပေ။ ထိုသို့
မပေးချင် ပေးချင် ငွေများ၊ အခြား အခြားသော
ငွေရ လမ်းများက သူတို့အတွက် ပေါများလှပေသည်။
ဒီတော့ ရပ်ကွက်အတွက် အကြောင်းပြု၍ ကောင်းမှု
လုပ်မည်ဆိုပြီး ငွေများသဲ့ယူကာ ပွဲလမ်းသဘင်များ
ပြုလုပ်ကြပေအုံးမည်။ ဒီကြားထဲ ဟိုရပ်ကွက်က
ဘာပွဲ၊ ဒီရပ်ကွက်က ညာပွဲ စသဖြင့် ရပ်ကွက်ရုံး
အလိုက် ပြိုင်ဆိုင်မှုများလည်းရှိကြပေသည်။
အာဏာရူး လက်ပါးစေ တသိုက်ရဲ့ စရိုက်မဲ့အမှုများကို
ကျောမွဲလူထုက ခါးစည်းခံကြရလေသတည်း။
ခါးစည်းခံကြရလေသတည်း ဆိုပေမဲ့၊ ခါးစည်းခံရင်း
ပျော်နေသူတွေလည်း ရှိကြသေးသပေါ့ ဟူ၍သာ။
October 19, 2026