“Ang atong dakbayan ang atong bahandi
Ang atong dakbayan ang atung kinabuhi
Panahon na para sugdan ang Pamahandi kay
Aron atung kaliwat dili makabuhi”
Iliganon sa kaliwat, dugo, buhat ug pagtoo.
Apan nganong ato namang gikalimtan?
Ang ilhanan sa atong kagikan?
Ingun ana nalang ba kasayon sa atong mga Iliganon?
Sa pagsubang sa adlaw, ang palibot nagpaminaw
Ang kahayag midan-ag sa takna sa pagbanag-banag
Sa pagsugat sa kabuntagon, gihigugma ang panahon
Inubanan sa pag-inom sa kape, pagsikay-sikay
Ug ang kalaay namatay, tungod sa pamahaw nga adunay gulay
Ug sa kalit nahibulong sa mananoy nga tingog sa mga langgam
Nga nagwagtang sa kahadlok nga nagkaanam
Ang kagikan sa atong kaliwat, ang hinungdan
Sa walay hunong nga pakighimamat
Ang yuta nga gihilanat nakalimot sa pag-igmat
Ang atung siyudad gilubong sa mga pagduha-duha
Kalibog ug panaglalis nga wala pa nahilis
Ug diri kita magsugod sa pagkat-on nga ang atung kaugmaon
Lumpagon sa makanunayon nga pag-ulipon sa dautan nga buluhaton
Ug diin kita makaingon isip usa ka iliganon
Nga nahanaw na ang bahandi nga anihunon
Magtanga raba kita? Kung ang bahandi nawagtang na?
Hikalimtan nalang ba nato ang atong yutang natawhan?
Nga napuno sa mga katalagman ug mga dautan?
Oras na aron ipapas, ang kahimtang nga
Nagsalimuang sa atung dakbayan nga nabuang
Ang lungsuranong kalag sa kanunay gibalibag
Niining kamot nga nabarag sa dakbayan nga nagkatibulaag
Ang bahandi nga gibitbit ang handumanan sa atong paglakbit
Ang atong katahom nga nangaipit sa dakbayan nga ang hustisya nihit
Ang yuta nga tinubdan sa kagikan nga maoy sumbanan
Sa bahandi nga gi-ampingan bisan pa sa mga katalagman
Ug kini napatik sa kinailadman sa atung dughan nga bulahan
Ang panahon nag aginod, ang mga adlaw nanga-anod
Ang kaayuhan nga naunlod sa dagat nga lawod
Kadaghan sa atimanon niining dakbayan nga wala nagmatngon
Ang kaugalingon bililhon apan ang bahandi nahimong anugon
Kanus-a paman matulon ang garbo sa katawhan nga buluyagon
Ang prinsipyo nga sa langit nasangko
Gisagubang sa dakbayan nga nagpungko
Ang kabag-ohan nga wala pa napupo
Sa katawhan nga wala nagmatuto
Ang kamatuoran nga wala pa nailhan
Ang timailhan sa kagubot sa dakbayan
Nganong ato mang gibiyaan?
Ang kaikag nga napatik sa dughan?
Naunsa naman kining Iligan?
Nga napuno sa kakulia-an nga dili mabantayan?
Ingun ana nalang ba ang atung padulngan?
Dakbayan nga ang kahi-usahan gipasagdan?
Nganong maghulat paman kita sa takna?
Nga ang atung siyudad nga pinalanga maguba?
Manindog kita sa atung yutang natawhan
Atung sugdan ang pagtambayayong
Atung ipatunhay ang panagdait
Atung ipakaylap ang kalinaw
Sa Iligan nga atung yutang natawhan.
