Artıq bir ilə yaxındır ki, tikiş tikməyi öyrənirəm. Bu vaxt ərzində yalnız özümə paltarlar tikmişəm, yəni öyrənməklə yanaşı, həm də qarderobumu yeniləmiş olmuşam. Öz tikdiyin geyimləri geyinmək hədsiz zövqverici bir şeydir.
Son tikdiyim geyim isə qış sviteri olub, sən demə qışda geyindiyimiz isti köynəklərin parçası da satılırmış. Bunu bilən kimi parça dükanlarına getdim və ürəyim istəyən bir parçanı seçdim. Kofta tikməyi planlaşdırırdım, buna görə iki düzüm muncuq da aldım və işə başladım.
Bu il gen paltarlar dəbdədir, buna dəb dilində "oversize" deyirlər, yəni böyük ölçülü geyimlər. Dəb bloqlarına nəzər salsaq görərik ki,bir və ya iki razmer böyük ölçülü geyimlər bu il trend olacaq.
Mən də dəbdən geri qalmaq istəmədim və sviterimi iri ölçüdə biçdim və tikməyə başladım.
İki günə yeni yun köynəyimi tikib hazırladım və öz rəngində seçib aldığım muncuqları yaxasına düzdüm. Muncuq düzmək daha çox vaxtımı aldı və bir az da gözlərimi ağrıtdı. Amma bunun özündən də zövq aldım.
Koftam hazırdı və artıq onu geyinirəm, görənlər çox bəyənir, tikdiyimi deyəndə isə təəccüblənirlər. Şəhərimizdəki dükanlarda belə koftaların qiyməti 40 manatdan başlayaraq 60 manatadək dəyişir, hələ mən bahalı butiklərdən danışmıram.
Mənim isə bu koftaya cəmi 17 manat xərcim çıxdı, 15 manat parçasına, 2 manat isə muncuqlara xərcləmişdim.
Məsələ yalnız maddi cəhətdən qənaət etməkdə deyil, öz tikdiyin paltarı geyinmək insanda özünə inam hissi yaradır və qəribə bir sevinc hiss edirsən.
