တိမ်တောင်သဖွယ် မင်ရေးကြွယ် သတဲ့။
မိတ်ဆွေတို့ ဘယ်လို သဘောပေါက် နားလည်ထားကြသလဲ။
တိမ်တောင် တိမ်လိပ်
တိမ်ရိပ် ရွေ့လျား
ပြေးသွား ပျံတက်
ဖြူဖွေး လျက်က
နိမ့်ကျ ဆင်းလာ
မဲနက် ခါမှ
ရွာကျ မိုးသဲ
တဖွဲဖွဲနှင့်
တလီပျံကြွ
မှုန်ထရေစက်
ထပ်ဖွဲ့ တိမ်တောင်
သက်တန့်ရောင်နှင့်
လှဆင်းဝေဖြာ
နေခြည်လာက
သဘာဝသည်
ဆည်းဆာချိန်သန်း
နေခြည်လွှမ်းတော့
ရောင်သွေးစုံသည်
တိမ်ပလီလား
ပန်းချီလားကွဲ့
ဖွဲ့နွဲ့ညွှန်းဆို
ထိုသူငါမှာ
မင်ရေးကြွယ်ငဲ့
တိမ်တောင်ဖွဲ့အား
ငါကား မှတ်တမ်း
ရေးသီစမ်းမည်
ဤကား ကဗျာ
ပီသလားဗျာ။
ကဲ ဒီနေ့ တိမ်တောင်တိမ်တိုက်တွေကို ကြည့်ငေးရင်း
အတွေး ဝေသီကာ ကဗျာစပ်လို့ မှတ်တမ်းတင်အပ်ပါသည်။
တိမ်တွေသည် ရွေ့လျား ပုံစံကွဲပြား ပြောင်းလဲတတ်သလို
နေရောင်ခြည်ကြောင့်လည်း အရောင်ကွဲပြား ထူးခြား
တတ်ပေသည်။
တိမ်တောင်သဖွယ် မင်ရေးကြွယ်သလို လူတို့သည်လည်း
ခုတစ်မျိုး တော်ကြာတစ်မျိုး အမျိုးမျိုးနှင့် ပြောင်းလဲ
ထွေပြား ဉာဏ်များပလီ ရှိကြသူတွေလည်း ပေါလှပေသည်။
သို့သော် တိမ်တောင်တိမ်လိပ်တို့ အမျိုးမျိုး အလီလီ
ပြောင်းလဲနေသည်ကို လူတို့ အလှ ခံစားလို့ ရပေမယ့်
လူတို့ ပလီ ပြောင်းလဲနေကြသည်ကိုတော့ ကြိုက်ကြအံ့
မထင်။
မိတ်ဆွေအများ ရိုးသား ကြိုးစား အောင်ပွဲများ ရကြပါစေသား။