SOGATA, HANA LON TURI DI LON

Salam alaikum wahee syedara
Nyoe ka troek teuka teuma di ulon
Lon nak meu panton nibak @sogata
Nisam Antara di sinan lon troen

Walau lon ikoet panton lon rika
Tapi @sogata han meuri di lon
Lon kalon gamba lon pandang muka
Lon peugah haba lon balah panton

Aleh pih gampong meurah mulia
Aleh di bangka di sinan gampong
Aleh dalam gle aleh di kota
Geupeugah haba sopan ngoen santon

Meunuroet dali bak hie deuh rupa
Ureung that muda umu 30 thon
Gampong di gob nyan Aceh Utara
Koen kota Langsa atau di Beutong

Bak dali adat loen eu pih hana
Lon kalon bahasa buhu meu alon
Geu tuleh panton meufhom that cara
Geu peugoet lomba cara seumeuson

Lawet lon ikoet panton sogata
Rame saudara meuturi di lon
Nyoe ngoen @abudar meurah mulia
Lon teugoer sapa sering that di lon

Tapi nyoe deungoen rakan @sogata
Baroe barosa ulon sapa phoen
Lawet lam panton lon peugah haba
Kontes keu dua bek na salah lon

Acie neu brie thei wahee @sogata
Pat gampong gata ci peugah bak lon
Pue keuh di dalam atau di lua
Pue di Malaya atau seunuddon

Pue keuh droen neuh duk simpang Rangkaya
Pu Dewantara di Desa Tambon
Pu di Ulee Lheu sideh di Banda
Atau di Peudawa rap tutue siroeng

Koen meunoe meudeh lon tanyoeng gata
Kadang syedara wali di ulon
Atau bak lonjak bak jalan raya
Sisat lam rimba kana soe tulong

Pulom di ulon na aneuk dara
Tari that rupa umu si ploeh thoen
Meu siploeh thoen teuk linto ji mita
Kadang @sogata jeut keu bisan lon

Ulon koh bak jok gulee lam paya
Lon koh bak ganja peugoet peunuroen
Nyoe neujak bak lon wahee @sogata
Nisam Antara di Batee Leusong

Neujak roet jalan simpang KKA
U wie neu puta troek Simpang Rambong
Oeh troek bak jalan meuseujid tuha
Reumoh sikula siceu reumoh lon

Nyoe keu alamat lengkap ngoen peta
Tapi that gura sideh gampong lon
Meu sinyal Hp kadang pih hana
Kirem berita ek u cong tampong

Oeh noe keuh dile wahee @sogata
Panyang cerita takoet meuron-ron
Asai na bacut si alakada
Tuleh cerita haba lam panton

Krueng Geukuh, 26 April 2018