ခရီးသွားပြန်တော့ သမီးရည်စားဘဝ
ဘာလိုလိုရယ်။
ရင်ထဲ ဖိုလှိုက်နေမိတယ်။
ကျွန်မတို့အရွယ် က ဖို့ကွယ်
အသက် မကြီးသေးပါမောင်ရယ်
ထန်းရွက်ပုတီးလေး ဆွဲလို့
ရွှေစာရံကို အရောက်သွားအုံးမယ်။
တနေ့က တပေါင်းလပြည့်ကျော် တရက်နေ့
ဖြစ်သည်။ ရွှေစာရံ ဘုရားသို့ ရောက်ခဲ့သည်။
ရွှေစာရံဘုရားပွဲက တပေါင်းလဆန်းမှ လပြည့်ကျော်ထိ
ကျင်းပသလားမသိပါ။ ကျွန်တော်သွားတော့
ဘုရားပွဲဈေးတန်းက စည်ကားနေသည်။
အညာနွေ နေပူပူအောက်မှာ အညာဘုရားပွဲက
ရိုးရာမပျက်စည်ကားနေသည်။ ဖုန်လုံးတလိမ့်လိမ့်ကြားထဲ
လူအုပ်ကြားထဲ တိုးဝှေ့ကာ သွားနေကြသည်။
ဘုရားဝင်ဖူးပြီး ဘုရားပွဲဈေးပတ်မိသည်။
ရွှေစာရံနှင့် ထန်းရွက်ပုတီးက ယှဉ်တွဲနေသည်။
သို့သော် ယခုခေတ်ကာလမှတော့ ထန်းရွက်ပုတီးကို
မက်မက်စက်စက်ဆွဲသူ မတွေ့ရှိတော့ပေ။
ရွှေစာရံပွဲ၏ လိုဂိုတခုအနေဖြင့်သာ ထန်းရွက်ပုတီး
များကို တွေ့မြင်ရသည်။
ဗူးသီခြောက်ဖြင့် ပြုလုပ်ထားသော ရေဗူးလေး
များကိုလည်းတွေ့ရသည်။ ဆီးသီးခြောက်များလည်း
တွေ့ရသည်။ အညာဘုရားပွဲပီပီ ကြက်သွန်နီ၊
ကြက်သွန်ဖြူနှင့် ငရုပ်သီးခြောက်များ ရောင်းချသူ
ဈေးသည်များလည်းတွေ့ရသည်။
ဘုရားပွဲဈေးတန်းမှ မုန့်ခေါင်းအုံးနှင့် ဆန်မုန့်ကြော်
များကို အများအားဖြင့် တွေ့ရသည်။ အိမ်စားရန်အတွက်
ဆန်မုန့်ကြော်တထုတ်နှင့် မုန့်ခေါင်းအုံးများကို ဝယ်ယူခဲ့သည်။
ရွှေစာရံဘုရားရောက်တိုင်း ဒုဌဝတီမြစ်ကြီးဘေး
သို့ သွားရောက်ကာ ငေးမောတတ်သည်။ ယခုအခေါက်တော့
အချိန်မရသဖြင့် မြစ်ဘေးသို့
မသွားရောက်ခဲ့ပါ။ ပွဲတော်ချိန်ဖြစ်သဖြင့် လူစည်၍လည်းဖြစ်ပါသည်။ နောက်တခါ
ရောက်ခဲ့ပါမူ အေးဆေးစွာဖြင့် အမတော်
စောမွန်လှ ရဲ့ အကြောင်းတွေးကာ
ငေးမောရပါအုံးမည်။
@htwegyi
March 14, 2024