Sultan Iskandar Muda
Deungon Bismillah kisah lon lambong
Sultan nyang Agong ulon calitra
Iskandar Muda raya that untong
Aceh geulindong bak marabahya
Bahya rot Barat teuka meugulong
Bandum geusinthong lam laot raya
Bahya rot Timu dijak meuron-ron
Laju geusayong hanjan jihoi Ma
Aceh lam aman leubeh 30 thon
Kuta ngon gampong dame sijahtra
Sampe ‘an jinoe ta sanjong – sanjong
375 thon dumnan ka lama
( baca: lhee tujoh limong )
Pakon roh teuma geusanjong sanjong
Kon kareuna mbong bukeuti hana
Jinoe lon seubut mangat neuhitong
Pakon jeuet lambong Iskandar Muda
Nyang phon kheurajeuen luah meuglong – glong
Troh Semenanjong Selat Malaka
Bengkulu Riau tanggoe Belitong
Borneo Lampong kon Aceh saja
Teuma keudua sigra lon singgong
Peng meuh sinoe phon di Nusantara
Deureuham peng Aceh nilai jih lambong
Jeuet bloe barang dum ban saboh donya
Masa nyan Aceh tinggi tamaddon
Na surat sion tinggai keu tanda
Keu daweuet ie meuh gohlom gob peuphon
Tanda bit Agong Iskandar Muda
Keu Ratu Inggreh geukirem langsong
Tanda meusambong ka meusyeedara
Keu 4 lon peugah kisah meusambong
Diplomat Agong Iskandar Muda
Portugeh Inggreh Cina nanggroe Rom
Bandum hai kawom hubungan mesra
Yoh nyan Beulanda goh meuho untong
Aceh ka harom ban saboh donya!!!
( T.A. Sakti )