Ulangan part1:
Putroe madeung tujoh uroe,
Mate Putroe tinggai ulama,
Tinggai aneuk ureung binoe,
Rayeuk keudroe po bijeh mata.
Part2:
Umu dua thoen rayeuk bacut,
Neupeurunoe beut le ulama,
Hate peungeh ban beuleun trang,
Jeut le rijang baca aleh ba.
Lheuh aleh ba baca Qur'an,
Nyan pih meunan jeut le lanja,
Tamat Qur'an peubeut kitab,
Nyan pih cakap bareh makna.
Habeh dumpue tungku peubeut,
Neuloep kitab neu bouh nama,
Tungku bouh nan Siti Hawilah
Nama ceudah hana ngoen sa.
Habeh dumpue tungku amanah,
Panggilan ALLAH mate ulama,
Mate tungku tinggai Siti,
Sinan lagi sajan Apa.
Neuduek tetap baca Qur'an,
Uroe malam hana reuda,
Meu seulaweut keu janjongan,
Nyak bungoen keumang taat agama.
Na keuh umu limoeng blah thoen,
Troeh tunangan Siti mulia,
Hana ridha cut sambinoe,
Berangkasoe linto teuka.
Neu eu ureung yang Troeh keunan,
Meusidroe tan yang taqwa,
Hingga sabe meunan macam,
Trok tunangan nibak raja.
Han syiet ridha Siti Hawilah,
Bah lon langkah jak lam rimba.
Meukoen meunan han get bagoe,
Bahle jinoe lon jak tapa.
Hingga teuma neucok langkah,
Ti Hawilah jak lam rimba,
Hana soe thei pih meusidroe,
Watee uroe susah apa.
Kaneu seutot keudeh keunoe,
Dari uroe hingga sinja,
Teutap apa dalam susah,
Ti Hawilah goloem geu gisa.
Ka meurempek Abdurrahman,
Teukeudi tuhan po yang esa,
Neu tanyong le teuma meunoe,
Puebuet keunoe dalam rimba.
Teuma suot Ti Hawilah,
Neupeugah bak ureung muda,
Uloen kujak wahe tungku,
Seubab nafsu lon bak gata.
Teuma suot Abdurrahman,
Meunye meunan that sejahtra,
Uloen pih ka khendak ALLAH,
Nyoe ka saboeh lon ngoen gata.
Geutanyoe dua ta meukawen,
Nak gadoeh jen tipu daya,
Mangat Teutap musyahadah,
Bek le was was dalam dada.
**Bersambung**
