Assalamualaikom jaroe ulon grak
Narit dua krak lon neuk meuhaba
Haba beurita yang ban meuhalak
Penguasa cangklak nanggroe digala
Sagoe di Laweung jinoe lam guyak
Ka sah lam ceukak buet toke Cina
Teken MoU hukom ngat sah jak
Nye na yang hayak lawan negara
Takalon poto yang ka beredar
Pak waki anggar bernama NOVA
Tamah DIN YARA dilikot teudong sangar
Seulaku MAKELAR peusah keunira
Kon keuh ta anti keu pembangunan
Kon hana seunang PT tanyoe na
Pue keuh na guna nyan pertanyaan
Keu rakyat taulan Laweung seujahtera
Kalheuh takalon jeh pat Di PT. Aron
Gah yang meukuron jinoe tan le na
Rakyat silingka brat meurakabon
Jitaki meuthon lam gasien papa
Yang cok syafa'at yang pangkat lambong
Tamah yang eumbong awak lhieh raja
Teuma jeulata limbot ija krong
Takot disinthong ditum bak muka
Tanyoe goh siap nyan yang masalah
Ilmee han sep gah aset manusia
Sikula yang na bideung tan jeulah
Yang na meutamah guru bidan saja
Teuma bagian tambang teumambang
SDM bideung nyan tanyoe gohlom na
Paleng security dijok seuragam
Jiteupue bugam syit eh nan kada
Nye bideung ahli yang raya reugam
Ureung jipeusan dari nanggroe lua
Lhee uroe keurija gaji ubee la'am
Tanyoe lhieh apam siumu masa
Deungon Bingkeng,
Reza Sofyan