Assalamualaikum Warrahmatullah
Rakan meutuah dalam platform nyoe
Lon keuneuk rawi lon keuneuk kisah
Haba yang leumpah rame tadeungo
Pasai pilkada yang paleng guyak
Ho yang tajangak rame yang seso
Rame yang hiro rame yang galak
Pue lom na tulak 50 sapo
Sineuk suara limong ploh ribee
O bit dum seudee ka manusia
Tapeujok nanggroe bak ureung kiree
Mameh tatubee oh musem pileh saja
Meunan lheuh hajat dibalot pangkee
Dijak pap asee Rakyat yum tan na
Kasep meumada limong ploh ribee
Teuduek bak balee meublek blek mata
Wahee rakan lon aduen ngon adoe
Bek ulang kudoe peukateun yang ka
Neupeuyum harga marwah geutanyoe
Bansa teuleubeh ateuh rhueng donya
Sayang neusayang sayang keu nanggroe
Calon yang bit noe bek neupileh le
Pue lom yang ganje jak peu ureung droe
Muda samlakoe yang meubee gambe
Si meutuah jroh dirhah ek goh gleh
Meutuah paleh jago meuhaba
Watee sikula olah keunoe keudeh
Aktivis canggeh jameun now masa
Neukalon calon yang jeulah bagoe
Yang hana ugoh droe ta'at agama
Malee dijih na dithee bijeh droe
Jroh meupeurangoe ngon tuha muda
Meunan keuh rakan haba uroe nyoe
Ulangkaji droe seubagoe bansa
Seujarah tanyoe dithee bangsa kloe
Tapi na rhem droe kon bangai buta
Yang ka teulanjo syit ka meugareh
Syit kameutuleh ruda meuputa
Jameun nyoe bansa dithee troh u Inggreh
Han dikeujeut langgeh geutanyoe bansa
Jinoe kamasa peusiap diri
Jalo sikoci geutanyoe beuna
Oh katroh masa lham kapai raya NKRI
Siap kendali kumodoe puta
Lon top lee oh noe haba terkini
Semoga rasi ingat seumua
Geutanyoe bansa na harga diri
Limong ploh ribee akhi kon yum tanyoe bansa
Deungon Cinta,
Reza Sofyan
