Ulangan part2:
Geutanyoe dua ta meu kawen,
Mangat gadoeh jen tipu daya,
Mangat teutap musyahadah,
Bek le was was dalam dada.
Part3:
Pakri tungku ta meu kawen,
Ureung laen sidroe hana,
Syit dua tanyoe sinoe lam uteun,
Laen ureung pat ta mita.
Soe peunikah dua geutanyoe,
Bak tempat nyoe tan ulama.
Hana teuka ureung kunoe,
Bak tempat nyoe rimba raya.
Abdurahman suot pantah,
Bek gata gundah wahee dinda,
Meunye goet niet dalam hati,
Tuloeng Rabbi geutanyoe dua.
Abdurahman teungeh meu tuto,
Troeh le tungku lhei droe teuka,
Ban neu kaloen Agam inoeng,
Tungku tanyoeng neu pareksa.
Pubuet tadoeng gata sinoe,
Ngoen ureung binoe laen hana,
Nyoe istri atau kawan,
Peugah bak loen jinoe sigra.
Koen isteri ureung binoe nyoe,
Merempek sinoe dalam rimba,
Teuma tungku neu kheun meunoe,
Ban dua droe Agam dara.
Goet ta meu kawen laju jinoe,
Untoeng kamoe sajan gata,
Tungku tanyoeng bak Abdurahman,
Neu kheun neutem hana dawa.
Loem neu tanyong bak Hawilah,
InsyaAllah uloen ridha,
Neupeuhakim droe bak tungku syiah,
Siti Hawilah sabe lam tapa.
Toeh jeulamei taba keunoe,
Neu jok meuh sikatoe bak ulama,
Syiah samboet nyan ujaroe,
Neubri jinoe pantas sigra.
Hana sapue tungku bak loen,
Trep ka jameun dalam rimba,
Yang na tungku hareuta kamoe,
Siringget nyoe na hareuga.
Neujok encien keu Hawilah,
Neupeunikah yoeh nyan sigra,
Abdurahman oeh lheuh nikah,
Teungku syiah neujak lanja.
Sibak kayee toe di sinan,
Geurasi nan rambong raya,
Bak peureudee sangat indah,
Ruhueng di teungeh ukheu lingka.
Ruhueng luah amat sangat,
Kayee raya that di dalam rimba,
Beu raya ujeun hana basah,
Rata tanoeh sang istana.
Abdurrahman kheun ubak siti,
Jinoe peureugi Geutanyoe dua,
Sinoe taduek bak tempat nyoe,
Dua Geutanyoe sigala yang na.
Bak malam nyan geupeutroh nafsu,
Sama-sama rindu ureung nyan dua,
Teuma le ngoen takdir Allah,
Keunan neu keubah manikam mulia.
Kakeuh hamel Siti Hawilah,
Nibak Allah nikmat teuka,
Asoe mangat beurangkajan,
Saket hantoem lezat teuka.
Troeh bak watee sikureung buleun,
Lahe bayi nyan neu pandang donya,
Tujoeh uroe duek di dapu,
Mate ibu ngoen ayahanda.
Siti Hawilah ngoen Abdurrahman,
Teukeudi tuhan sigoe ban dua,
Tinggai aneuk sinan sidroe,
Ureung binoe jroh that rupa.
Loem trok teuka ureung lhee droe,
Jak seumanoe pantas sigra,
Lheuh seumanoe pasoe lam kafan,
Geutanoem sinan ureung nyan dua.
Ureung lhee droe peurintah tuhan,
Karonya gobnyan di dalam rimba,
Teuma geu woe ureung lhee droe,
Manyak sidroe tinggai di sana.
Beu that di iem beu that jimoe,
Ngoen tan sidroe budak barona,
Wie ngoen uneun balek batang,
Ngoen sidroe tan dalam rimba.
bersambung