Bəzi qidalar var ki, onları ev şəraitində asanlıqla düzəltmək olar. Mümkün olan şeyləri evdə düzəltməyə çalışıram. Holland pendiri, mayonez, pul bibər və.s.
Dünən pul bibər düzəltdim və bir neçə foto çəkdim. Bəlkə də dükanda satılan kimi alınmasa da, mənim xoşuma gəlir və daha təmiz, qatqısız, təbii olduğunu bilirəm. Acı yeməyi çox sevdiyimə görə hər il bu vaxtlar pul bibər düzəldirəm və gələn yaya kimi istifadə edirik.
Əvvəlcə yaşıl acı bibərləri sapa düzüb balkonda günəş şüaları düşən yerdə divardan asdım. Bibərlər quruyub qıp-qırmızı qızarandan sonra acıb onları xırda hissələrə ayırdım.
Qəhvəçəkən maşında hissə-hissə üyütdüm, bu çətin bir proses idi. Bibərin acısından öskürürdüm və boğulurdum. Amma buna dözməyə məcbur idim.
Beləliklə pul bibər hazır oldu. Hardasa oxumuşdum ki, üyüdülmüş pul bibəri zeytun yağında qovurmaq lazımdır, amma mən buna ehtiyac duymadım.
Acı yeməklər orqanizmdəki mikrobları öldürür, daxildəki qurdları məhv edir, immuniteti gücləndirir. Acı yeməyən insanları başa düşə bilmirəm düzü.
Ən acı yeməkləri keçən yay Batumidə olarkən yedim. Gözümdən yaşlar axırdı, amma çox dadlı idi və bundan zövq alırdım.
Acı yeməkdən qorxmayın, bu adrenalinin ən sadə bir növüdür.
