Musim pileg pilpres wis teka
Udan teka banjur sawah dipaculi diwluku
Rabuk disebar dibanyoni secukupe
Wancine welut padha golet mangan
Wancine para calon pemimpin golet pemilih
Urek-urek mancing welut
Pancing dicancang tali senar
Precil cilik dienggo empan
Para calon pileg pilpres nganggo werna-werna cara umpan
Mbudidaya ben kepilih duwe kuasa
Milih pemimpin sing apik jan angel
Ning luwih angel maning urek-urek mancing welut
Seliyane urek-urek, nggolet welut nganggo cara ngobor lan ngaprang uga angel
Ngaprang gawe blumbang
Pinggire diencot-encot nganggo sikil
Welut metu nang jero blumbang
Gari dicekel ceg
Angger arep pilihan pemimpin
Sekang gunung desa tekan kutha
Warga dikon metu nang dalan apa lapangan
Karepe ben bisa dicekel suarane
Angel-angel gampang
Gampang-gampang angel
Tesih angel gole ngaprang
Sing padha guyup tur rukun
Angger urek-urek lan ngaprang
Ulih welut nggo dijangan
Utawa dibakar gawe sambel
Nylekamin
---
Basukine, Gombong 2018
Lingkar Sastra Gombong (Lisong)
