Ulôn peudoë, saböh karang.
Lam tulésan, tuléh radat.
Adun adoë, simak beutrang.
Peulôn peutrang, djinoë siat.
Haba lôn mèë, laku bak sang.
Keulakuan, njan tjiët karab.
Keu udjông buët, seunda wajang.
Bék neutuban, rôh han adab.
Pat njang ja'ét, bék guransang.
Meuah rijang, meusalah radat.
Maklum ulôn, tulèh peusan.
Mantöng tjeukang, keuneubah kitab.
Allahumma, Allah Tuhan.
La'en tjiët tan, meusaböh zat.
Hanja Allah, maha Rahman.
Njang Poë alam, luwah that that.
Ngon teuleubèh, sifeut Rahman.
Han-ék paban, meutanjoë mat.
Teuma hamba, ikôt saban.
Surôh Tuhan, laku beuthat.
Lam buët pudjoë, uroë malam.
Keu seumajang, phôn ibadat.
Trôh puasa, keumudijan.
Laku beutrang, lam djeut sa'at.
Bak seudeukah, ta utôh fham.
Fakir sajang, jatim tamat.
Mutui tabrië, gasèh sajang.
Talakukan, ban Muhammad.
Bak buët njang djröh, talèt ridjang.
Keu balasan, tanjoë harap.
Harap sjuruga, keu mudijan.
Sidèh keukai, djeut djeut sa'at.
Sidèh tanjoë, hudèp seunang.
Tanlèë bak sang, lam ibadat.
Teuma tatjok, buët jôh awai.
Masa abang, dônja meuhat.
Lam dônja njoë, tjotjok tanam.
Tapréh padjan, panén bulat.
Got tapula, panén piëh djai.
Miseu biët tan, kakeuh ilat.
Tapi paloë, saböh faham.
Surôh Tuhan, bék hatèë klat.
Meutapubuët, bék sjhok faham.
Meuhan saban, tan ibadat.
Bék teukabôe, rija datang.
Tanjoë bak sang, hajeuë that that.
La'en hana, ban lôn tuwan.
Yang meuiman, keu pada rabbana.
Lôn lah sabèë, njang seumajang.
Wadjéb saban, deungon sunat.
Lôn njang hajeuë, lam iseulam.
La'en barang, tan njang ilat.
Lôn seudeukah, ribèë gupang.
Haji manjang, trôh lôn pandjat.
Aneuk jatim, lôn njang sajang.
Mutui saban, lôn brië nikmat.
Miseuë tungku, niët neuh meunan.
Sa lagèë tan, neu ibadat.
Keurna rija, buët lagèë njan.
Allah Tuhan, beuntjië neuh that.
Tudjôh plôh thôn, neutjeuë teuman.
Koh amalan, lam ibadat.
Djéh teukabôe, hatèë guntjang.
Seubab keuh njan, gadôh leugat.
Meutapubuët, surôh Tuhan.
Lam fikiran, beugot that that.
Beugléh hatèë, tjotjok tanam.
Njan tjiët meuhan, hantrôh tamat.
Hatèë peugléh, phón dilèë hai.
Barôe lheuh njan, la'en tamat.
Hatèë kutoë, rugoë bak sang.
Uroö malam, hantrôh hadap.
Reudôk lam glèë, udjeun lam blang.
Ngob balôhan, padang kasab.
Beumanfaat, saboh karang.
Pada rakan, timu barat.
Hanya keuh nyoe, saboh peusan.
Pat han reumbang, neu peutupat.
Bék neu tjatji, lôn keumarang.
Ban beuladjar, tuléh radat.
