Psalmus VI

Officium Defunctorum. Ad Matutinum. In I Nocturno, 2 (Nocturnale Romanum [p. 184] + macrons)

1. In fīnem, in carmínibus. Psalmus Dāvīd. Prō octāvā.
2. Dómine, nē in furōre tuō árguās mē, *
   neque in īrā tuā corrípiās mē.
3. Miserēre meī Dómine, quóniam īnfirmus sum:*
   sānā mē Dómine, quóniam conturbāta sunt ossa mea.
4. Et ánima mea turbāta est valdē: *
   sed tū Dómine, ū́squequō?
5. Convértere Dómine, et ḗripe ánimam meam:*
   salvum mē fac propter misericórdiam tuam,
6. Quóniam nōn est in morte quī memor sit tuī:*
   in īnfernō autem quis cōnfitḗbitur tibi?
7. Labōrāvī in gémitū meō,
   lavābō per síngulās noctēs lēctum mēum: *
   lácrymīs meīs strātum mēum rigābō.
8. Turbātus est ā furōre óculus meus:*
   inveterāvī inter omnēs inimīcōs meōs.
9. Discḗdite ā mē omnēs quī operā́minī inīquitātem:*
   quóniam exaudīvit Dóminus vocem meam flētus meī.
10. Exaudīvit Dóminus dēprecātiōnem meam,*
    Dóminus ōrātiōnem meam suscēpit.
11. Ērubēscant, et conturbentur vehementer, omnēs inimīcī meī:*
    convertantur, et ērubēscant valdē vēlṓciter.

(Antiphonale Synopticum)