“Wat dut dei ier din aal zoo vroug...?!”, loop vanoet 't Rond oover maat in Winschootn. Maatluu baawn rusteg heur stek op. De sauger, dei d' paaige al zoo woagnwied oopn het, ropt nog eemn deur: “'t Is ja nog duuster Bie de aandre maatluu vind e noit veul geheur. Ducht mie dat e denkt da'k goin Grunnegs verstai.
Van binn laach ik eemn: “Veuroorduiln, weal is d'r noit haard van wordn.” Stait hom nait aan dat d'r noit om zien beulkerij lagt wot. Dus richt hoi zoch tot de luu van draaimeuln: “Hou vroug zol e al opstoan weedn, vief uur?” Mor dei goan noit mit in zien kaawel. Onze hummel het bie hun heul wat rondjes draait op zotterdag. Kon mie vedoage oetsloapn, zeumn uur was 't da'k van 't nust oet ging. Was nog lekker waarm, mor haar al weer 'n tiedje draait en keert. Op tied boodschappn doun op zotterdag, want zoo dicht bie feestdoagn, din wot drok in Sodom. Lidl gait al om acht uur oopn, dat scheelt.
Kirrel het zoo haard beulkt dat rest van leutje Mokum non ook wel wakker weedn zolln. Hier en doar groet ik mit goimueurn, op zien hooghoarlemmerdieks. Noast de HEMA stoit de sympathieke maatman mit dei lekkere kouknoap woast, hoi voetbaalt soamn mit Siep, ach OalDamsters woitn 't weal ja. Hoi het non drok mit vraaw om de kroam op tied schier te kriegn. Doar teegnoover stait Tonny mit zien viskroam, oet Termuntn, hoi is nog wat stille vedoage, mor is ook ja nog goin kip. Lus goin vis, allent gruinte wat oet 't wotter komt krieg ik d'r deur. Jammer, soms liekt dat zoo lekker, as ik luu zoo zo'n heern noar binn zoi schottern.
Schier op tied in de Lidl, toch al drokker as ik doach. Mor kinn tof deurkacheln mit de karre. Bin al wat weant aan induiln ier, mor blief dit pand 'n schontbais vindn. B. Reer woit d'r vast weal road mit as dizze suuper weer in 't Rond zit. Wor hoast aanreedn deur 'n veurroad karre mit gruinte. Mor blift aal vrundelek, van baide kantn, goin oetserij ier. Hier mot ook ja gewoon invakt wordn as d'r al klantn binn. Goit de heule dag zoo deur. Ketaaier eerder d'r weedn, haalf uur noa bliemn, zolln ze dat ook betoald kriegn? Mor bin leuke luu dei doar waarkn, meansn begroetn dut doar in eks geval nog goin piene.
Scheelt 'n eanne, minder drok, alles binn poar minuutn in karre. Noar kassa, goin riege, op baand, inpakkn en weg weedn. Ducht mie da'k loater stad nog eemn in goi, mor goin weekelekse boodschappn meer. Dus wat meer ontspann, eemn noar Aaceetieon en zoks wat. Trog weag loop ik nog eemn weer bie Kieksjop en Hema langes noar 't Rond. Oover maat, de sjaucher kiekn mie aan en ik kiek mit glimlach trogge. Dizzen hebbn d'r noit veul zin in volgns mie. Goin stroalnde oogies, goin opgewekte oetstroaln, hoop da't veur hun nog biedraait vedoage. En atenoje! Dei geinponum van eerder het 't eemn stoer mit 'n vrouge klant, 't aalom waarkt in wonderlekke menaairn. Verkneukel mie eemn as ik hom weer richtn bais deis.
In 't Rond is muur dichte, schier stuukt, en doar stait non groode opbloaspobbe in lichtfeest sfeern. Nog eemn en zunne komt onze kaande weer op. Jammer van dei lichies dei d'r veur hangn. Kinn dei noit vot en kinn nog 'n groode gruine spar mit lichies doar in houke? Heb d'r mit de droagboare nog eemn footoo van mokt en op 't web zet. Katser André het 't nog rustig in zien verneide zoak, groet hom eemn in 't veurbie goan. Winschootn is nog rusteg, mor dat zal in de loopn van d' uurn weal verandern. Want de feestdoagn kommn ja ras dichter bie.
As ik hom trogge noar zuud deis kom ik vishandeloar Zuudemoa junior teegn, drok aan 't bealln, op weag noar de zoak. Thuus kommn eemn de weekelekse opbaargn, kop pleur mit, 'n stokje tekst tikkn en weekeanne is begonnn.
