Assalamualaikum handai ngon taulan
Bak lon na peusan keu tanyoe dumna
Keu kawon muda ban banta seudang
Dengon peurawan yang dara dara
Menyo katroh umu neu neubri le Tuhan
Pike beurijang ke rumoh tangga
Meunan le Nabi neujok peuneusan
Ngat sah Iseulam peunoh agama
Bek that tapike goh na kayaan
Bek jeut urusan goh na hareuta
Bek jeut masalah han tari ruman
Saweub bandum nyan bisa meutuka
Bek le geutanyoe pacar pacaran
Sigra jak tunang bak ureung tuha
Bek lamseupot peubuet-buet syaitan
Menyo na jantan jak bak KAU
Menyo gohna judo wahe e rakan
Oh lheuh seumayang beuna meudoa
Talakee laju keudeh bak tuhan
Dak tan peurawan kajeut ngon janda
Bek that su ai keu tari ruman
Tatimang-timang meunurot kada
Tapi beu meuceh nyang kuat iman
Teuntee deungon nyan akan bahgia
Maka le jinoe bek wayang wayang
Peurintah Tuhan laju keurija
Mantong kreueh tuleung sihat ngon badan
Ek tajeumeurang dua kuala
Bek singoh teulah wahe e rakan
Tungkat warisan ka tumpoi mata
Keupeulom guna oh ka lageenyan
Sayang peunulang han jeut keurija
Laju peujok droe keudeh bak Tuhan
Tamah oh lheuh nyan sunggoh useuha
Bek le meulingkeue lheuh beuleun lapan
Jinoe le rakan ka jeut ba tanda
Mustafa Ibrahim Delima, Anggota FAMe Chapter Pidie
