Boh soe han meuheut meunye keu kaya..
Meulimpah harta serta jabatan..
Tapet ngen tableut gaji di teuka..
Tamah ngen sewa toko bangunan..
Keu ineng meu lhee ek ta usaha..
Ta tamah dua keu cabe cabean..
Peu yang peureulee yue lakee sigra..
Moto ngen honda oke silahkan..
Rumoh meutingkat tapeugot beu raya..
Tukang tasewa olah rancangan..
Moto meukilat dileun meubanja..
Tamah lom honda nyan keu pajangan..
Aneuk dirumoh tajok sikula..
U amerika jak cok pendidikan..
Ineng na lhee boh sabe ta ba ba..
Sira beulanja keudeh u medan..
Tapi oh mate mandum kan sirna..
Hana meuharga harta jabatan..
Sinan keuh dile teujoh ie mata..
Umu sidup na tanyoe siakan..
Aneuk peurumoh yang tanyoe bangga..
Hp di buka nibak kuburan..
Hana tasatoh ileumee agama..
Mp3 diputa geulantoe yasinan..
Golom seuneujoh tanyoe dilupa..
Gadoh meudawa lakee bagian..
Tanyoe geubloh bloh dalam keureunda..
Meu sikrek do'a hana trok sajan..
