Udeip di gampoung masa ubiet-biet long makanan silaein bu di rumoh payah jak tuweueh keudroe, han saban lagee masa jinoe. Jinoe tinggai jak bak kios sinan ka jeut bloe ciki, indomie, coklat. Atawa jak bak keudei kupi macam dum kueh basah.
Jameun meunyoe di rumoh sikula nyang meuceuhu that gula tareik. Meulisan ie jouk geuweot ngon teupoung, ka leukiet geutareik meuputa, jeut keu gula tareik.
Woe sikula meunyoe na boh panjoe bak jalan, atawa jak mita putiek ulam (saboh macam putik u nyang mangat tapajouh, hana klat). Laein nibak jak lam uteuen jak mita boh pisang bue (masam buah), atawa boh rambout bue, boh timon tikouh, atawa boh kayee lagee boh rambout, boh manggeih ngon boh mamplam. U muda barou meuteumeung pajouh meunyoe na ureueng eik u. Meujan-jan meuteumeung u dadeih atawa u buleun tak (aleh pajan jitak lei buleuen).
Meunyoe museim boh mamplam, ban beungoh rap peungeuh ka laju u yup bak mamplam jak mita boh mamplam rhot. Meujan-jan meuawai awai ngon manok. Boh mamplam rhot tinggai siblah euncit jikap lei lhong atawa tupee, jibaplueng lei manok, peuleit beuteuga sampoe meuteumeung. Hana rhah-rhah langsoung pajouh (yeueh). Museim boh mee, jak mita boh mee rhot.
Meunyoe na geupuwoe bada atawa ceundoi nyang geubloe lei ureueng chik di keudee, nyan ka makanan mewah that. Pue lom mie goreing, meuseukei that.
Bu bungkoh makanan mewah. Meunyoe meuteumeung pajouh bu bungkouh peugah bak ngon bandum kaleuh pajouh bu mangat. Meunyoe di Bireuen meugah that bungkouh Kartiwi (bu pajak).
Nyan keuh hai meutuwah peunajouh aneuk muda jameun.
