- တူးပို့ဒိုးဆစ်သံအစား
တက်ကနိုဘိသံတွေကြားလာရတဲ့နှစ်သစ်ကူးမှာ
ဘယ်သွားသွား ရေမစိုဘူး အမေ။ - တန်ခူးလထဲမှာမှပွင့်ပြကြတဲ့
အဝါရောင်ပန်းတွေကလဲ
ပိတောက် မဟုတ်ကြတော့ဘူး။ - အုန်းလက်ရွက်စိမ်းစိမ်းလေးတွေကြားက
စပယ်ပန်းနံ့လေးမွှေးပျံ့အေးမြနေခဲ့တဲ့
လောင်းလှေထဲကရေကလေးတွေ
ပုခုံးပေါ်လောင်းချလိုက်တဲ့
ဖြူစင်တဲ့ချစ်ခြင်းမေတ္တာတရားတွေနဲ့အတူ
တမာပွင့်မြေသင်းနံ့မွှေးနေတဲ့မြေပေါ်ကို
တစိမ့်စိမ့်စီးဆင်း
အဲတာ ချင်းတွင်း ပဲမဟုတ်လား။ - ရင်ဘတ်ကြီးနဲ့ ထုဆစ်ပုံဖော်ဖွဲ့သီထားကြတဲ့
ကိုယ်စီကိုယ်ပိုင်အနုပညာပစ္စည်းတွေကို
တီးမှုတ်သီဆိုကပြဖြေဖျော်
မြို့လုံးကျွတ် ပျော် ခဲ့ကြဘူးတယ် ဆို။ - '' ---- အမျိုးသားရေသဘင်အဖွဲ့ကြီး''
'' ကျမ်းမာပါစေ ''
'' - - - - အမျိုးသမီးရေသဘင်အဖွဲ့ကြီး''
'' ကျမ်းမာပါစေ ''
ကျမ်းမာပါစေ ကျန်းမာပါစေတဲ့လားအမေရယ်။ - ဒီမယ် မုန့်သည်မ အမေရဲ့
အမေ မုန့်ရောင်းခဲ့တဲ့
ဟောဒီကမ်းနဖူး သောင်ပြင်ဦးမှာ
နောင်နှစ်ပေါင်းများစွာကြာ
တစ်ခုသော တန်ခူးလမှာ
ကမ္ဘကျော်သင်္ကြန်ပွဲ
ခြိမ့်ခြိမ့်သဲဆင်နွှဲကျင်းပ
ဝက်ဝက်ကွဲပျော်ရွှင်ကြလိမ့်မယ် လို့များ
ဗျာဒိတ် တော်မြွက်ကြား
တခုတခုများ ပြောထားခဲ့သေးလားအမေ။ - တူးပို့ဒိုးဆစ်သံတွေအစား
တက်ကနိုဘိ သံတွေကြားလာရတဲ့နှစ်သစ်ကူး
ဘယ်သွားသွား ရေမစိုတော့ပါဘူးအမေရယ်။
From @lulin44