Bago ang lahat, nais ko lang sabihin na ito ang unang beses na magpahayag ako dito sa Steemit gamit ang ating sariling wika. Ang pagpapahayag ko dito ay isang paraan ko para masanay at mahasa ang aking kakayahan sa pakikipag - usap gamit ang wikang Filipino. Sa mga ngtataka kung bakit ko ipinahayag ito kung pagsasanay lang ito kasi nais kong malaman ang inyong opinyon kung paano ko pa mapapaunlad ito. Lahat ng mga mungkahi ay malugod kong tatanggapin.Maraming salamat.
Kahapon ay araw ng Linggo at nakasanayan na naming magkamag-anak ang pagsisimba. Bago pa nagsimula ang misa ay may dumating na mga tao kasama ang isang binatilyo na diumano ay nasapian ng masamang espirito. Salaysay ng isa sa mga kasama na ang binatilyo ay kakauwi lang galing sa siyudad. Matagal-tagal na siyang hindi nakakauwi dahil abala siya sa pagre-review para sa LET (Licensure Exam for Teachers) at nakikituloy lamang pansamantala sa bahay ng kanyang nakatatandang kapatid. Pagdating diumano sa kanilang bahay ay bigla itong nangisay at nagsisigaw kaya agad agad tinawag ng kanyang ina ang kanilang kapitbahay upang magpahatid sa ospital. Nang nakasakay na sila ng motorsiklo (nasa liblib na bayan kami at motorsiklo lang ang paraan ng transportasyon) ay ayaw raw umandar ng motor kaya bumaba ang ina ng binatilyo at bigla daw sumigaw ito ng "Pahawa mo diri. Dili ko mukuyog ninyo.Tabang ma. Dad - a ko sa simbahan. " Matapos raw sabihin ng binatilyo ang mga katagang iyon ay bigla na lang itong nagsalita ng mga salitang hindi nila maintindihan at bigla itong nagkaroon ng kakaibang lakas na hindi kayang pigilan ng 2 tao. Kaya minabuti ng isang kapitbahay na gamitin ang kanyang sasakyan at dalhin na ito sa simbahan. Nang nasa simbahan na sila ay parang normal lang ang kinikilos ng binatilyo kaya hinala ng pari ay stressed lang ito.
Nasapian nga ba o stressed lang ang binatilyo?
Sa aking palagay, totoo ang hinala ng pari na STRESS ang sanhi ng kakaibang ikinikilos ng binatilyo dahil katatapos lang ng LET at stressed siya sa kahihintay ng resulta. Gustong - gusto niyang makapasa sa exams upang matulungan ang kanyang naghihikahos na pamilya. Dahil sa tagal ng paglabas ng resulta ay may tendency na magiging pessimistic siya kasi atat na siyang matulungan ang pamilya niya. Isa pa, hindi gugustuhin ng masamang espirito na makakita ng krusipiho, eh bakit normal lang siya ng ilapit sa kanya ito? Nasapian man o stressed lang, ang binatilyo lang ang nakakaalam.
Sa inyong palagay, totoo pa kaya ang sinasabi nilang "nasapian ng masamang espirito"? Ipaabot ang inyong mga opinyon.
