Di barat senja, meu jingga mirah
bumoe ujeun rhah, a'n supot uroe
Luka lam hate, meusampe leupah
ingat seujarah, cinta lam lumpoe
Ka lagee jaloe, yang gadoh galah
Seunudang patah, jiba han muhoe
Nakhoda bamee, han mupat arah
Uloen neukeubah, leupie lam asoe
Hoe neuba dali, janji ngon sumpah
Teusia payah, cinta loen hiroe
Hana loen sangka, dinda meu ubah
Rasa that gundah, baten loen sungkoe
Koen uloen deungoe, haba gob peugah
Bah keuh loen peusah, ngon dua jaroe
Teutapi jinoe, bandum ka jeulah
Hate beu ikhlah, ka loen peu tuwo
Bah pih mieng ilee, ie mata darah
Hate sang beukah, bak nyum uloen moe
Foto keunangan, jinoe ka beukah
Han le loen keubah, hate loen rangoe
Loen tiek keunangan, lam laot luah
Seunom lah kulah, teumpat seumanoe
Walau di jiwa, meu rasa teulah
Bah keuh loen pasrah, hudep loen sungoe
Hanjeut ta peudong, beuneung ka basah
Tanda meupisah, dua geutanyoe
Pakoen hudep loen, sabe lam susah
Neubi ya ALLAH, saba uloen nyoe
Harap keu cinta, o'en tubee reubah
Kama teuhiah, peuratah busoe
Han sampe hai dek, tanyoe meunikah
Aleh peu salah, cinta seulesoe ?
Peu kana laen, yang lebeh gagah
Seuhingga bagah, gadoh keumudoe
Neu ukee gaseh, seulaseh indah
Rupajih lidah, meucabeung lagoe
Bek le neu harap, jeumpa meu ulah
Han le loen seurah, sigra meu gantoe
Han peu neu lakee, hai dek meutuwah
Han sama ceurah, ka crah Meuduroe
Leubeh goet neuba, haba neu olah
Sang-sang di babah, cuma loen sidroe
Rupajih sideh, laen neu keubah
Si abang gagah, hana loen tusoe.
Pena Kinet BE
