Berikut cuplikan nazam Syekh Abdus Samad alias Tgk di Cucum mengenai Zikirullah, selamat membaca!: . Teungku Di Cucum I Lailahaillallah, kalimah thaiyibah jeuet keu payong Neu peulara bandum kamoe, meunan jinoe neubri untong Lailahillallah, kalimah thaiyibah kuta nyang raya Soe nyang tem duek lam kuta nyan, seulamat iman hate lam dada Peubuet suroh peujeuoh teugah, hamba Allah nyang sijahtra Nyoe nyang laen lon amanat, beuta ingat E aneuknda Pat-pat na meugah hai puteh lumat, bungong hekeumat peukayan dada Yoh goh prang Aceh dilee saboh hat, bungong hekeumat meugah muliya Aceh pih reule ‘ohlheueh kaphe mat, bungong hekeumat leunyap pat nyang na Le syahid Teungku neuwoe bak rahmat, bungong hekeumat bak gobnyan punca Sangkira Teungku neubri seulamat, bungong hekeumat rata rinyeun na Soe teumeung sunteng bungong hekeumat, geuliyueng mangat deungo nyang beuna Soe teumeung sunteng bungong hekeumat, hate jih thaat barangjan masa Soe teumeung sunteng bungong hekeumat, nyawong jih mangat watee keuluwa Soe teumeung sunteng bungong hekeumat, teupuka kasyaf leumah peue nyang na Beudoh jak mita bungong hekeumat, supaya mangat hate lam dada Nyang le bungong nyan dinanggroe luwah, Makkah Madinah sinan phon mula Dinanggroe Irak ngon nannggroe Kufah, rame sileupah keubon peunula Meunurot dali neubrile Allah, keubon nyang luwah ‘oh akhe masa Maken that akhe maken meutamah, keubon nyan teuhah rata teumpat na Lam nanggroe tanyoe hanale leumah, lawet ka leupah Teungku neugisa Teutapi dudoe leubeh lom luwah, deungon afuwah Syiyah Kuala Kana soe puwoe dinanggroe Makkah, bungong peuet ulah hudep peunula Bijeh meutabu neubrile Allah, neujok ‘inayah keu ureueng puga Qudrat Iradat kuasa Allah, soe-soe meutuwah jiteumei mita Ji teumei pangkee bungong lhee ulah, soe nyang na teuhah hate lam dada Bungong lapan on mantong that mudah, bungong peuet ulah tapreh-preh teuga Bungong lapan on meususon ulah, harah dua blaih aleh lam lam ha Bungong kalimah ulah teudong-dong, takalon mantong meuteumeung pahla Ulah bungong nyan nacit nyang meurok, takalon beutok jeuet peungeuh dada Bungong bak ulah leumah lapan on, tan meu-ek meutron beurangjan masa Soe teumeung sunteng bungong tojoh on, Tuhan peuampon sigala dausa Soe teumeung sunteng bungong tojoh on, langet meususon pinto geubuka Soe teumeung sunteng bungong tojoh on, roh jih lam ayon watee ‘oh geuba Soe teumeung sunteng bungong tojoh on. Jiduek yub payong Blang Padang Masya Lailahaillah, beumeutuwah aneuk hamba Beujitem seubut Kalimah Lailahaillallah. Bungong nyan sah keuyum Syuruga Bareh lapan nyankeuh bungong, pham beukeunong cut ngon raya Bareh lapan geukheun bungong, gunci ngon tamong pinto Syuruga Watee takheun deungon lidah, Lailahaillallah bak jipoh ha Bareh lapan tinggai tujoh, sabab karoh ka jipoh ha Nyankeuh lon kheun bungong tujoh on, bek meuron karon watee tabaca Lailahaillallah, pasoe lam babah kalimah zike Bungong lapan on mantong na mudah, bungong peuet ulah nyang that meuseuke Bungong lapan on Thariqat Hadad, baca beule that tiep watee sabe Lailahaillallah, Kalimah Thaiyibah kuta nyang tinggi Soe le baca Kalimah Thaiyibah, urat darah ji meunari Hate didalam seunang ka teuhah, ingat keu Allah Nyang Maha Suci Teungku Di Cucum II Lailahaillallah, Kalimah Thaiyibah kuta nyang tinggi Bungong lapan on kalheueh lon peugah, bungong peuet ulah deungo lon kheunkri Wahe aneuk nyang na tuwah, tadeungo gah pat-pat teurjali Pat-pat nyang na teuma meugah, Zikerullah lateh rohani Ngon nyan teubuka ‘ileumei nyang luwah, Kalimah Allah seubut ngon hate Beureuseh hate neubrile Allah, raseuki mudah karonya Rabbi Raseuki haleue Tuhan neulimpah, meunan geupeugah didalam rawi Watee ta’amai deungon ikheulah, lakee bak Allah taubat beugeubri Talakee ampon pat-pat nyang salah, nyawong bak leupah dalam Jannati Tadeungo jinoe ulon meupeugah, supaya mudah jeuet tatukri Bukon sayang Miruek Pango, sinan jinoe na teumpat Kaluet Watee akhe teuma dudoe, tanle sidroe nyang jak khaluet Tanle Teungku soe peurunoe, taek keudroe teumpat kaluet Suloek kaluet jak lateh droe, jak peugleh droe bandum sifeuet Jak boih dausa darah asoe, jak meutoe ngon Tuhan makbud Hate pigleh nibak kuto, ka baro toe ngon Tuhan makbud Duek lam kaluet malam ngon uroe, hate peulaloe ngon Ya Makbud Baca Tahle malam uroe, bak duek sidroe nyan tapubuet Suloek kaloet sithon lhee go, lam watee droe nyan geupubuet Syakban Ramadhan nyang phon sigo, teuma dudoe lam Haji peubuet Buleuen Molod nyang keulhee go, jumeulah uroe tujohploh ka Dalam tiep thon watee lhee go, geupeusaho lheuh nyan teuma Meungna umu neubrile Po, nam thon jinoe payah keureuja Suloek kaluet meunan bagoe, baro sampoe ‘oh meunan na ‘Ohka cukop sithon nam uroe, ‘oh meusaho uroe jina Duek lam kaluet malam uroe, na dum bagoe zike taba Zike qalbi ngon lathaif, trooh bak nafi isbad nama Troh bak ‘ukuf muraqabah, bandum sudah tammat teuma Trok bak tahle nyang manyang that, ‘ohnan meuhat suloek geuba Bukonle dhiet panyot kande, that meuseuke ‘oh tamita Duek lam kaluet zike sabe, seubut zike peue nyang kana Peue nyang geuyue uleh guree, meunan teuntee takeureuja Lailahaillallah, ngon lidah tabaca sabe Tan laen Po nyang lon seumah, malengkan Allah Rabbol Kade Duek lam kaluet hate dahsyah, Allah Allah seubut di hate ‘Ohka tamat bandum sudah, Allah Allah nyan zike se ‘Ohlheueh suloek deungon kaluet, ‘ileumei peubuet dumka geubri ‘Ileumei bandum ka habeh jeuet, adab peubuet dumka meukri Guree kalon bandum sifeuet, soe nyang kajeuet ijazah neubri Neujok ijazah ban laku jeuet, deueh bak sifeuet neukalon kri Rame ngon le khalifah jeuet, nyang kalheueh beuet ijazah neubri Nyang meuseuke jareueng na jeuet, keu mursyid nyang that tinggi Lam siribee hana meupeuet, mursyid nyang jeuet ijazah neubri Jok ijazah sigala buet, keu mursyid nyang that tinggi Guree kalon bandum sifeuet, narit ngon buet dum geutukri Pajoh ranub jih bak mirah, tacok seupah sumbo puree Mursyid kajeuet ngon khalifah, geu ijazah uleh guree Dum ileumei ubit luwah, jok naseukhah uleh guree Bukonle dhiet tanoh Makkah, sinan payah hudep kayee Nyangka mursyid geubri ijazah, bungong peuet ulah sikarang lhee Zike hate Allah Allah, nyang lon peugah bungong karang lhee Zike qalbi nama jih sah, Allah Allah bareh jih lhee Sinan hai Nyak ulon peugah, supaya mudah tacok teurajee Jak bak Teungku cok ijazah, Zikerullah nyang bareh lhee Bukonle dhiet tanoh Makkah, Blang ‘Arafah teumpat dum Haji Bungong jih lhee Kalimah Allah, salasilah diphon bak Nabi Jebra-i peutron lam guha Hirak, masa neujak kaluet Nabi Jebra-i cok nibak Tuhan, peutroh yohnyan jok keu Nabi Nabi sambot bak watee nyan, meuhadapan ngon Jebra-i Keu sahbat peuet Nabi pulang, hingga luwah bak dum sufi Ngon sahabat meusilsilah, meu ijazah hate keu hate Mula diphon meusalasilah, ‘an sudah kiyamat bumi Bukonle dhiet K’akbatullah, jak dum tawaf ureueng Haji Bukonle dhiet dum silsilah, naseukhah bandum ka meukri Bukonle dhiet K’akbatullah, hamba Allah nyan qiblati Bahauddin Naksyabandiyah, nyang peuluwah zike qalbi Bukonle dhiet tanoh Makkah, asaliyah lahe Nabi Bukonle dhiet zikerullah, nyang peugleh hate nyang keuji Geuboeh nama Zike Isem Zat, Thariqat Naqsya Bandi Nyangkeuh Imum lam Thariqat, Bahuddin meuhat nama geurasi Saboh pinto tamong taubat, ngon nyan meuhat bagah asi Dausa zina dausa liwat, ‘oh jitaubat bandum meukri Dausa baten nyang teusom that, rotnan meuhat bagah suci Jantong leumoh jih gusuen that, bagah puleh Tuhan neubri ‘Ohka keunong hate meucap, ‘oh keunong lhat nama Ilahy Tuboeh la’eh teuga meuhat, asoe urat dum beureuhi Seumayang tinggai hate batat, tan teuingat suroh Rabbi Tan ji teupeue uroe Jumeu’at, meungnyo kathat hate meulhi ‘Ohka keunong hate meucap, buet Syari’at baro meukri Baroka mangat peubuet ‘Ibadat, hate ka teupat hana meugawi(o) Seumbahyang limong bandum ka meukrat, puwasa meuhat bandum ka meukri Ureueng nyang maksiet cit rotnoe taubat, laen tan sapat jalan teupuka Meugoh gleh hate han ek takarat, adak gob pakat han ek tahila Dum ek gob maba jipadan taubat, hate beungeh that keu ureueng maba Meu’oh jitamong jitem jak taubat, hanpeuele pakat bandum teurasa Ureueng nyang maksiet deungon nyang ‘awam, wajeb hai rakan taubat ngon sigra Wajeb tatamong tatueng Thariqat, sunat cit meuhat bak takeureuja Ureueng nyang ‘awam tapadan meuhat, tangieng nyang batat seumbahyang hana Jih nyan tamaba peulop bak taubat, supaya meupat dijih rahsiya Rahsiya tuboeh baro jitupat, bandum na hijab habeh teupuka Baro ka jithee laloe raya that, baro ji tupat hate lam dada Ureueng nyang lazem kayem ‘Ibadat, hanpeue tapakat keunan tamaba Geuturi keudroe jalan nyang teupat, bandum na hijab hate lam dada Ileumei Tasawuf ngon peugleh hasad, maksiet siploh boh teusuet uluwa Taek ugle takoh keu tungkat, pileh meuhat kayee ‘Ali Lethat kasiet ngon hekeumat, kayee tungkat Saidina ‘Ali Zike hate nyan Isem Zat, geukheun Thariqat Naqsya Bandi Dum biek raya dausa lethat, bagah teupat Tuhan neubri Akai nyang brok gadoh meuhat, deungon bereukat Naqsya Bandi Nyankeuh aneuk kalon peugah, asailiyah phon teurjadi Paneuk haba ulon peugah, silsilah meuribee ahli Pat-pat lehna teuma meugah, ‘oh leupah kamoe peureugi Tinggai gata ubit leupah, nyan silsilah tatupeue dali . sumber ( T.A. Sakti ) foto ini hanya buat pemanis saja ,saya tidak tau nama beliau siapa yg jelas beliau pejuang Aceh di masa kerjaaan Aceh
