Ang hirap mo namang abutin
Kahit anong pilit na ika’y sungkitin
‘Di ka pa rin naaangkin
Nitong uhaw kong damdamin
Sa gabi’y tanaw ka ng aking mga mata
Na kahit ang dilim ay ‘di alintana
Sa umaga’y laging hanap-hanap ka
Na kahit ang liwanag ay gumagabay pa
Nawa’y mahulog ka nalang mula sa kalangitan
At kumanlong na sa ‘king kandungan
Kung dumating man ang sandaling ‘yan
Tiyak na ‘di na kita pakakawalan
Sa ngayo’y ika’y mithi pa
Subalit ika’y dalangin na kay Dios Ama
Dahil kung alam mo lang aking sinta
Ika’y giliw kong tinitingala
