Time na one of the most important thing for this life. Everything we dey do from how we grow, the way we develop, and even how we think all na time matter. If you sabi manage your time well, you fit achieve plenty. But if you no take am serious, time go just pass you like breeze
I no go lie, I be small procrastinator. I go plan something for morning, then tell myself say Make I rest small first, I go do am later Before I know am, day don almost finish. I go just dey look myself dey wonder wetin happen. Sometimes, I even go dey watch reels or laugh at funny videos instead of facing my tasks. Na real struggle
But lately, I dey try change small small. I don realise say this “I go do am later” na one of the biggest lie wey we dey tell ourselves. Time no dey ever wait. I try plan my day now, even if na just write two or three things wey I must finish. I no dey rush do ten things again. If I complete small, I dey happy say I move forward.
To me, 24 hours fit be enough if you sabi am. But if you no get plan or you dey waste time on things wey no matter, you go feel say the time no reach. Now I try focus on the important things first. Once I finish my main work, I go rest small maybe listen to music, watch one episode of a show, or just lie down and relax. I believe say rest too dey important, no be everything be work.
Some things wey I feel say dey waste time na gossip, too much scrolling on social media, and unnecessary arguments. Before before, I dey involve in all these things. But now, I don realise say dem no add anything to my life. If I finish something wey get meaning, I dey feel more fulfilled. But if I waste the day, I dey feel somehow inside me.
I still dey learn how to manage time better I never perfect but I dey grow. Even small improvement still be progress, and I dey proud of how far I don come. I no want reach one stage in life come dey regret say I no use my time well
So for now, I dey try use my time to do things wey matter to me. I dey avoid distractions and I dey stay focused as much as I fit. I still fall off sometimes, but I always remind myself say time no get duplicate. Once e go e don go.
@powerpaul/engdeu-simple-as-that-stand-out-heres-why-and-how
