My nysc na one year I no go fit forget. I serve for Plateau, and for that town you go see some kind things wey go shock you. Some of the shock sweet, some of them bad and others go just make you salute baba God for life.
One thing I like for that town na be say they like to muzz. Whether na beer, Kai kai, or igbo you like, you must contact when you enter there. Me I be nigga wey dey booze and drink Kai kai, so that place be like my papa house.
E get one day wey I dey my own jeje dey down one bottle of Star I buy for one joint. Next thing I know, one senior man come join me for the table, and I shock small because other tables been dey the place but nothing concern me, na beer carry me come.
Next thing I know, this man bring out one big Bluetooth speaker dey play mumu songs for the place but again, nothing concern me, na beer carry me come here. I don curse am for my mind but as a good boy, I just quiet.
As I finish my second bottle, I wan pay commot for the place because my money don finish and the song dey give me headache but as I tell the barman to come take money, this baba wey dey play mumu songs ask me whether I no go drink another one? I say yes because for my culture we no dey reject free beer.
As e buy me the beer, I come say make I form familiarity, and we start to gist. The senior man say he dey airforce and he just come see him family. He wave the barman then speak hausa give am and next thing I know, I see one big bowl of meat for our table. Senior man say make I chop and I gree because for our culture we no dey reject free meat.
As I taste the meat, I shock the way e sweet. The thing be like chicken and cow born sweet abomination. As I dey chop this sweet meat, na so the senior man say "oboy, I no know say you go like dog meat like this oh".
As he talk that thing I just weak. I never chop dog before because e get as e be. Meanwhile see me here don chop like half bowl of the meat and I come dey feel bad. Las Las I still follow am finish the meat sha, because for my culture we no dey start wetin we no go finish.
This na my entry for this week challenge wey make we talk story for pidgin. See the details here
