Syair

Salam'alaikum kawom Iseulam Rakan ngon Taulan Tuha dan Muda Banmandum pujoe meuwoe keu Tuhan Shalatu Salam Khatam Ambiya - Uroe hoe dijak 'oh Geusak malam Bukon keuh sinan saboh Rahsia Nabi Ibrahim nibak saboh Jan Keupada Tuhan geumohon pinta - "Eya Tuhanku Khaliqul 'Alam Ureung meuninggai jawoeng keulua Kiban keuh singoh uroe komdian Neusak lom keunan Jawoeng manusya - "Wahee Ibrahim" geujaweub Tuhan "Peukeuh gata nyan, han ta peucaya? "Jeut ulon peuna dari awai tan Meunyan jawaban hana lon kira" - Jaweub Ibrahim "Wahee e Rabban Bukon lon tuwan han lon peucaya Nak tamah Nyakin lon tanyong meunan Mangat kong iman eya Rabbana" - "Wahee Ibrahim Meunyoe lagee nyan Tacok 4 macam Ticem digata Baci keuh Tasie bandum Tacincang Lawoek beurijang mangat meutuka" - "Tumpok digata beuna 4 macam Peuduk 'oh lheuh nyan teumpat bek sama Jak mita gunong peuduk disinan Jarak gunong nyan ji'oh lagoina" - "Lheuh nyan tameuhoi akan ticem nyan Teuntee awak nyan akan jiteuka" Laju Ibrahim geupubut meunan Dalam Al-Qur an na geucalitra - "Dua Reutoh Nam Ploh" Lumboi ayat nyan Meukalam Tuhan ngon khalifahnya Surat Baqarah sinan cukop trang Sunggoh meundalam hikmah calitra - Tanyoe sut surah atau pedoman Dari ayat nyan keutanyoe dumna Peumantong Ticem atau kiasan Ulon ci bayang seun-seun sibanja - itek ngon Ak-ak manok nyang agam Meurak 'oh lheuh nyan ka 4 peukahra Itek jirok-rok Jeumoh keu lambang Hanatom teunang di awak Lubha - Teuma di Ak-ak meupukeuh lambang Curin si insan jiba bahaya (Curin=Licik) Manok nyang ku 'Uk teuntee yang Agam Meunyan keuh lambang Angkuh lam donya - Teuma di Meurak cidah kon wayang 'Ujub keu lambang bak Manusia Meunan keuh bacut kalheuh lon bayang Neutimang-timang sira neubaca - Lon pada 'oh noe cae meu ulang Maklum lon tuan bukon pujangga Dilon tan titel lagi lon awam Watee meungarang teuntee jai cupa - Lon galak panton cae ngon Nadham Pusaka moyang Lon galak raya Pat mantong salah meu'ah hai rakan Lon kheun Wassalam peunutop rika ------------------------------------ 2A, Lhokseumawe 22 Desember 2017 Allah ﷻ berfirman, وَإِذْ قَالَ إِبْرَاهِيمُ رَبِّ أَرِنِي كَيْفَ تُحْيِي الْمَوْتَىٰ ۖ قَالَ أَوَلَمْ تُؤْمِنْ ۖ قَالَ بَلَىٰ وَلَٰكِنْ لِيَطْمَئِنَّ قَلْبِي ۖ قَالَ فَخُذْ أَرْبَعَةً مِنَ الطَّيْرِ فَصُرْهُنَّ إِلَيْكَ ثُمَّ اجْعَلْ عَلَىٰ كُلِّ جَبَلٍ مِنْهُنَّ جُزْءًا ثُمَّ ادْعُهُنَّ يَأْتِينَكَ سَعْيًا ۚ وَاعْلَمْ أَنَّ اللَّهَ عَزِيزٌ حَكِيمٌ Dan (ingatlah) ketika Ibrahim berkata: “Ya Tuhanku, perlihatkanlah kepadaku bagaimana Engkau menghidupkan orang-orang mati”. Allah berfirman: “Belum yakinkah kamu?” Ibrahim menjawab: “Aku telah meyakinkannya, akan tetapi agar hatiku tetap mantap (dengan imanku) Allah berfirman: “(Kalau demikian) ambillah empat ekor burung, lalu cincanglah semuanya olehmu. (Allah berfirman): “Lalu letakkan diatas tiap-tiap satu bukit satu bagian dari bagian-bagian itu, kemudian panggillah mereka, niscaya mereka datang kepadamu dengan segera”. Dan ketahuilah bahwa Allah Maha Perkasa lagi Maha Bijaksana. (QS:Al-Baqarah | Ayat: 260).