ជាអគ្គនាយកប្រធានរបស់ក្រុមហ៊ុនសហពាណិជ្ជកម្មលំដាប់ពិភពលោកនិងធំជាងគេបង្អស់របស់ចិនដែលមានឈ្មោះថា Dalian Wanda Group មហាសេដ្ឋី Wang Jianlin បានក្ដោបក្ដាប់ទ្រព្យសម្បត្តិចំនួន៣០.៨ពាន់លានដុល្លារ នេះបើយោងតាមរបាយការណ៍ពីទស្សនាវដ្ដី Forbes ដែលបានចេញផ្សាយកាលពីខែឧសភាកន្លងទៅថ្មីៗនេះ។ តើទស្សនគតិបែបណាដែលមហាសេដ្ឋីចិនរូបនេះបានប្រកាន់ខ្ជាប់ ដែលនាំឲ្យគាត់អាចកសាងចក្រភពដ៏ជោគជ័យធំមួយដូច្នេះបាន ?
មានវ័យ៦៣ឆ្នាំ លោក Wang ធ្លាប់មានប្រវត្តិក្នុងវ័យកុមារភាពបម្រើការជាទាហានក្នុងសម័យចិននៅក្រោមការគ្រប់គ្រងរបស់មេដឹកនាំម៉ៅ សេទុង។ គាត់បានលើកឡើងនៅក្នុងសៀវភៅរបស់គាត់ដែលមានចំណងជើងថា “The Wanda Way” ថាការហ្វឹកហាត់ដ៏តឹងរ៉ឹងនៅក្នុងទាហាន បានហាត់ពត់លត់ដំអត្តចរិតរបស់គាត់ឲ្យក្រាញតស៊ូមិនងាយនឹងបោះបង់ងាយៗ។
គាត់ចាប់ផ្ដើមជាមួយប្រាក់ប្រមាណ១៣ម៉ឺនដុល្លារ ដើម្បីអាចកសាង Dalian Wanda Group ក្លាយមកជាចក្រភពដែលមានឥទ្ធិពលបំផុតនិងមានគ្រឹះដ៏រឹងមាំមិនងាយនឹងបំបាក់បានដូចពេលបច្ចុប្បន្ននេះ។ ក្រុមហ៊ុនសហពាណិជ្ជកម្មលំដាប់ពិភពលោកនេះគឺជាផ្នែក៣ធំៗដែលមានទាំងផ្នែកពាណិជ្ជកម្មអចលនទ្រព្យ ឧស្សាហកម្មវប្បធម៌ និងផ្នែកហិរញ្ញវត្ថុ។ ក្នុងឆ្នាំ២០១៦ គាត់ត្រូវបានទស្សនាវដ្ដី Forbes ចាត់ចូលជាបុគ្គលដែលមានទ្រព្យច្រើនជាងគេបំផុតរបស់ទ្វីបអាស៊ីជាមួយនឹងទ្រព្យសម្បត្តិចំនួន២៨.៧លានដុល្លារ និងស្ថិតនៅលំដាប់ទី១៨របស់ពិភពលោកប្រចាំឆ្នាំ២០១៧នេះ។
គាត់តែងតែនិយាយថា៖ «កុំចាប់ផ្ដើមអាជីវកម្មដោយគ្រាន់តែចង់បង្កើតលុយ។ តែចូរចាប់ផ្ដើមអាជីវកម្មដើម្បីបង្កើតការផ្លាស់ប្ដូរ។ អាជីវកម្មដែលបង្កើតឡើងដើម្បីតែចង់បានលុយ គឺជាអាជីវកម្មដ៏អន់បំផុត។ រាល់អាជីវកម្មទាំងអស់គួរតែមានគោលដៅគិតគូរពីដង្ហើមជីវិតយូរអង្វែងរបស់វា»៕
