Google គឺជាក្រុមហ៊ុនបច្ចេកវិទ្យាតម្លៃរាប់ពាន់លានដុល្លារនិងឈរនៅលើលំដាប់កំពូលគេរបស់ពិភពលោក។ តើមាននរណាម្នាក់ដែលកំពុងតែប្រើប្រាស់អ៊ីនធឺណិត តែចៀសផុតមិនប្រើប្រាស់សេវាកម្មយ៉ាងទូលំទូលាយឥតមានដែនកំណត់ដែលក្រុមហ៊ុន Google បានផ្ដល់ឲ្យជីវិតរស់នៅរបស់ពួកយើងទេ ? Google ត្រូវបានបង្កើតឡើងដំបូងដោយស្ថាបនិក២រូបគឺលោក Harry Page និងលោក Sergey Brin។ ប៉ុន្តែកាលពីឆ្នាំ២០១៥ ដំណែងជានាយកប្រតិបត្តិក្រុមហ៊ុនGoogleទាំងមូល ត្រូវបានផ្ទេរទៅឲ្យអ្នកបច្ចេកវិទ្យាជនជាតិឥណ្ឌាមួយរូបគឺលោក Sundar Pichai។ តើCEOថ្មីរបស់Googleជានរណា ? ហេតុអ្វីទើបលោកអាចឡើងមកកាន់ដំណែងជាអ្នកកាច់ចង្កូតក្រុមហ៊ុនGoogleបាន ?
កាលពីឆ្នាំ២០១៥ ស្ថាបនិកGoogle លោក Harry Page បានប្រកាសជាសាធារណក្នុងការប្រគល់ដំណែងជានាយកប្រតិបត្តិរបស់ក្រុមហ៊ុន Google ឲ្យទៅអតីតអនុប្រធានជាន់ខ្ពស់លោក Sundar Pichai ហើយលោក Harry នឹងផ្លាស់ប្ដូរការយកចិត្តទុកដាក់របស់គាត់ជានាយកប្រតិបត្តិរបស់ក្រុមហ៊ុនដែលទើបនឹងបង្កើតថ្មីមួយទៀតរបស់Googleគឺ Alphabet ជាមួយនឹងដៃគូសហការដដែលគឺលោក Sergey Brin។
CEOរបស់Google លោក Pichai កើតចេញពីត្រកូលគ្រួសារដែលមានជីវភាពមធ្យមមួយរបស់ឥណ្ឌា ដែលមានឪពុកជាវិស្វករអគ្គិសនីនិងម្ដាយជាអ្នកstenographer។ គ្រួសាររបស់គាត់រស់នៅផ្ទះដែលមានបន្ទប់តែ២ប៉ុណ្ណោះ ហើយគ្រួសាររបស់គាត់មិនមានទូរស័ព្ទប្រើប្រាស់រហូតទាល់តែគាត់មានអាយុបាន១២ឆ្នាំ និងគ្រាន់តែជាទូរស័ព្ទលើតុដែលបង្វិលលេខដើម្បីចុចហៅចេញប៉ុណ្ណោះ។ លោក Pichai បានបញ្ចប់ការសិក្សាថ្នាក់បរិញ្ញាបត្រផ្នែកវិស្វកម្មលោហធាតុពីវិទ្យាស្ថានបច្ចេកវិទ្យារបស់ឥណ្ឌា (Indian Institute of Technology)។
ការបោះជំហានបន្ទាប់ដ៏ធំនៅក្នុងឆាកជីវិតរបស់គាត់គឺនៅពេលគាត់ទទួលបានអាហារូបករណ៍មកបន្តការសិក្សានៅសាកលវិទ្យាល័យ Stanford ក្នុងរដ្ឋកាលីហ្វ័រញ៉ា សហរដ្ឋអាមេរិក។ គាត់ក៏បានរៀបរាប់ថា គាត់តែងតែចូលចិត្តបច្ចេកវិទ្យារហូតមក ហើយក៏តែងតែសុបិនស្រមៃពីSilicon Valley ដែលជាមជ្ឈមណ្ឌលប្រមូលផ្ដុំទៅដោយបច្ចេកវិទ្យាកំពូលៗដែលអ្នកកំពុងតែប្រើប្រាស់នេះ។
មុននឹងលោក Pichai បានបោះជើងចូលក្រុមហ៊ុន Google នៅឆ្នាំ២០០៤ លោកគឺជាវិស្វករក្នុងឧស្សាហកម្មមួយរូបរបស់ក្រុមហ៊ុន Applied Material និងជាអ្នកប្រឹក្សាគ្រប់គ្រងឲ្យក្រុមហ៊ុន McKinsey&Company។
លោក Pichai បានលើកឡើងគំនិតរបស់ខ្លួនទៅកាន់ស្ថាបនិកលោក Harry Page និងលោក Sergey Brin ដើម្បីចង់ឲ្យGoogleមានកន្លែងសម្រាប់searchរបស់browserដោយខ្លួនឯង។ លទ្ធផលដែលនាំទៅរកសមិទ្ធផលជោគជ័យដ៏ធំធេងរបស់Google គឺជា Chrome browser ដែលកំពុងតែមានអ្នកប្រើប្រាស់រាប់លាននាក់នៅជុំវិញពិភពលោក ថែមទាំងស្ថិតក្នុងជម្រើសកំពូលគេរបស់អ្នកប្រើប្រាស់ផងដែរ។
ប្រព័ន្ធប្រតិបត្តិការAndroid ដែលធ្លាប់តែនៅដាច់ដោយឡែកពីGoogle ក្នុងឆ្នាំ២០១៣ក៏ត្រូវបានអតីតអនុប្រធានជាន់ខ្ពស់របស់Googleរូបនេះគ្រប់គ្រងទាំងស្រុង ហើយចាប់ពីពេលនោះមកក្រោមការដឹកនាំដោយលោក Pichai ក៏បានដើរតួអង្គដ៏សំខាន់នៅពីក្រោយភាពជោគជ័យរបស់ប្រព័ន្ធប្រតិបត្តិការAndroidក្នុងពេលបច្ចុប្បន្ននេះដែរ។ ភាពជោគជ័យទាំងនេះក៏បាននាំលោកទៅកាន់ដំណែងខ្ពស់ជាងមុនបន្ទាប់ទៀត ដែលត្រូវទទួលខុសត្រូវស្ទើរតែគ្រប់ផលិតផលទាំងអស់របស់Google ដែលក្នុងនោះរួមមាន search, maps, Google+ ជាដើម។
ស្ថាបនិកលោក Harry Page បានលើកសរសើរដោយក្ដីពេញចិត្តនៅក្នុងថ្ងៃប្រគល់ដំណែងជានាយកប្រតិបត្តិទៅឲ្យលោក Pichai ចំពោះសមត្ថភាពដ៏អស្ចារ្យរបស់លោកក្នុងការសម្លឹងឃើញអ្វីៗដែលនៅខាងមុខ និងអាចដឹកនាំក្រុមដើម្បីសម្រេចនូវកិច្ចការដ៏សំខាន់ ហើយគាត់ក៏បានលើកឡើងបន្ថែមថា នៅពេលនិយាយពីផលិតផល ពួកយើងតែងតែត្រូវរ៉ូវគ្នាជានិច្ច ដែលនេះហើយបានធ្វើឲ្យគាត់ពិតជាស័ក្ដិសមបំផុតសម្រាប់ដំណែងមួយនេះ។
លោក Pichai គឺជាអ្នកដឹកនាំមួយរូបដែលទទួលបានការគោរពស្រឡាញ់ពីបុគ្គលិកទាំងអស់ ហើយក្នុងប្រព័ន្ធផ្សព្វផ្សាយតែងតែរៀបរាប់ពីអត្តចរិតរបស់គាត់ជាមនុស្សដែលគិតបានស៊ីជម្រៅនិងមានក្ដីមេត្តាដល់អ្នកដទៃ។ ម្យ៉ាងទៀតលោកក៏ទទួលបានការអបអរសាទរពីប្រធានាធិបតីរបស់ឥណ្ឌា Narendra Modi នៅក្នុងថ្ងៃលោកទទួលបានដំណែងជាCEOថ្មីរបស់Googleផងដែរ៕
Posted from my blog with SteemPress : http://khmernewsshare.com/archives/5228