<figure>
</figure>
<figure>
<figcaption>អគារការិយាល័យកណ្តាលរបស់ធនាគារ Daegu នៅកូរ៉េខាងត្បូង។ រូបថត សហការី</figcaption></figure>
ភ្នំពេញៈ ធនាគារកូរ៉េ Daegu កាលពីថ្ងៃពុធបានសម្រេចទិញភាគហ៊ុន ១០០ ភាគរយពី ធនាគារឯកទេស Cam Capital ដែលជាធនាគារឯកទេសធំជាងគេទីពីរនៅកម្ពុជា គិតតាមទ្រព្យសកម្ម ដោយមានតម្លៃជាទឹកប្រាក់ ៦៣,២១ លានដុល្លារ។ នេះបើយោងតាមសេចក្តីរាយការណ៍របស់សារព័ត៌មានកូរ៉េ។
សារព័ត៌មានកូរ៉េខាងត្បូង The Korea Herald កាលពីម្សិលមិញបានរាយការណ៍ថា ធនាគារ Daegu បានដាក់លិខិតផ្លូវការទៅអាជ្ញាធរហិរញ្ញវត្ថុកូរ៉េទាក់ទងនឹងកិច្ចព្រមព្រៀងទិញភាគហ៊ុនពី Cam Capital កាលពីថ្ងៃពុធ ហើយបានបញ្ជាក់ថា នេះជាការទិញភាគហ៊ុនគ្រឹះស្ថានហិរញ្ញវត្ថុនៅក្រៅប្រទេសរបស់ DGB Daegu ទីបីហើយបន្ទាប់ពីធ្លាប់មានការទិញភាគហ៊ុនគ្រឹះស្ថានហិរញ្ញវត្ថុនៅចិន និងវៀតណាមរួចមក។
NBC ដែលជានិយតករវិស័យហិរញ្ញវត្ថុកម្ពុជាមិនអាចទាក់ទងធ្វើការបញ្ជាក់ និងអត្ថាធិបាយពីកិច្ចព្រមព្រៀងទិញលក់ភាគហ៊ុននេះបាននៅឡើយទេកាលពីម្សិលមិញ។
លោក Stephen Higgins ស្ថាបនិក និងជាសហអ្នកគ្រប់គ្រងក្រុមហ៊ុនប្រឹក្សាផ្នែកហិរញ្ញវត្ថុ Mekong Strategic Partners (MSP) បានលើកឡើងកាលពីម្សិលមិញថា កិច្ចព្រមព្រៀងនេះជានិន្នាការមួយដែលបង្ហាញពីការច្របាច់បញ្ចូលគ្នាក្នុងចំណោមប្រតិបត្តិករក្នុងវិស័យនេះ ដែលត្រូវបានស្វាគមន៍នៅក្នុងឧស្សាហកម្មហិរញ្ញវត្ថុកម្ពុជា។
យ៉ាងណាក៏ដោយ លោកបញ្ជាក់ថា មិនមានចំនួនធនាគារច្រើនទេដែលចង់លក់ភាគហ៊ុនរបស់ខ្លួននាពេលនេះ។
លោកថ្លែងថា៖ «បើ Cam Capital នៅតែជាធនាគារឯកទេស ជំហានបន្ទាប់របស់គ្រឹះស្ថាននេះពិតមែនមិនអាចប្រាកដបាននោះទេ អ៊ីចឹងនៅពេលមានធនាគារពាណិជ្ជចូលមកទិញភាគហ៊ុនដូច្នេះ វាហាក់ដូចជាសមហេតុផលណាស់ថា ធនាគារនេះអាចវិវត្តដោយងាយស្រួលក្នុងការទទួលបានអាជ្ញាប័ណ្ណជាធនាគារពាណិជ្ជ»។
លោកបន្ថែមថា៖ «NBC ទំនងជាមិនអនុញ្ញាតឲ្យ Cam Capital ឡើងទៅជាធនាគារពាណិជ្ជទេ ប្រសិន ធនាគារនេះមិនមានធនាគារពាណិជ្ជដែលមានកេរ្ដិ៍ឈ្មោះចូលមកជាភាគហ៊ុនិកដ៏សំខាន់នោះ»។
គិតត្រឹមដំណាច់ឆមាសទី១ឆ្នាំនេះ ធនាគារកូរ៉េ Daegu មានទ្រព្យសកម្មសរុប៤៣ពាន់លានដុល្លារ។ ធនាគារឯកទេស Cam Capital វិញត្រូវបានបង្កើតឡើងនៅកម្ពុជា កាលពីឆ្នាំ ២០០៩ ហើយប្រតិបត្តិការសាខា ៥ ជាមួយនឹងបុគ្គលិកចំនួន ២៦០ នាក់។
យោងតាមរបាយការណ៍ត្រួតពិនិត្យរបស់ NBC គិតត្រឹមឆ្នាំ ២០១៦ ធនាគារ Cam Capital មានទ្រព្យសកម្មសរុប ៨៦,៥ លានដុល្លារ ជាធនាគារឯកទេសធំទីពីរបន្ទាប់ពីធនាគារអភិវឌ្ឍន៍ជនបទ ដែលជាធនាគាររបស់រដ្ឋដែលមានទ្រព្យសកម្ម ១០១ លានដុល្លារ។ កាលពីឆ្នាំ ២០១៦ ធនាគារ Cam Capital ទទួលបានប្រាក់ចំណេញសុទ្ធ ៣,៣៨ លានដុល្លារ។
ការទិញភាគហ៊ុននេះមិនមែនជាលើកដំបូងនោះទេ ដែលធនាគាររបស់ប្រទេសកូរ៉េបានទិញគ្រឹះស្ថានហិរញ្ញវត្ថុកម្ពុជា។
កាលពីឆ្នាំ២០១៤ ធនាគាររបស់ប្រទេសកូរ៉េខាងត្បូង Woori Bank បានទិញភាគហ៊ុនគ្រឹះស្ថានមីក្រូហិរញ្ញវត្ថុ Malis Finance កម្ពុជាក្នុងតម្លៃ ៤,៩ លានដុល្លារ។
កាលពីឆ្នាំមុន ធនាគារ Jeonbuk Bank ជាបុត្រសម្ព័ន្ធក្រុមហ៊ុន JB Financial Group បានទិញភាគហ៊ុន៥០ភាគរយក្នុងធនាគារពាណិជ្ជភ្នំពេញ។
ការច្របាច់បញ្ចូលគ្នា និងការទិញភាគហ៊ុននៅក្នុងឧស្សាហកម្មហិរញ្ញវត្ថុរបស់កម្ពុជា បានក្លាយជាធម្មតាទៅហើយ ដោយសារធនាគារពាណិជ្ជបរទេសស្វែងរកការចាប់យកកំណើនផ្ដល់កម្ចីដ៏រឹងមាំរបស់កម្ពុជា។
និន្នាការនេះត្រូវបានអ្នកវិភាគមួយចំនួនបានព្យាករចាប់តាំងពីដើមឆ្នាំ ២០១៦ មកម្ល៉េះនៅពេល NBC បានបង្កើនតម្រូវការដើមទុនអប្បបរមារបស់គ្រឹះស្ថានធនាគារ ដែលប្រតិបត្តិការនៅកម្ពុជា ដោយបង្កើនពីរដងលើចំនួនកំណត់ទុនសម្រាប់ធនាគារពាណិជ្ជ និងធនាគារឯកទេស និងបង្កើន១០ដងសម្រាប់គ្រឹះស្ថានមីក្រូហិរញ្ញវត្ថុ៕
Posted from my blog with SteemPress : http://khmernewsshare.com/archives/4918