ក្រុងប៉ារីស: រថយន្ដចម្លងផលិតពីឈើ 2CV របស់ក្រុមហ៊ុន Citroen ផលិតដោយជាងតុទូបារាំងម្នាក់ដោយប្រើឈើប្លែកៗ រួមមានដើមប៉ោម ដើមព័រ និងឈើររី ត្រៀមបង្ហាញភាពសង្ហាលើដងវិថី។
បុរសចូលនិវត្ដន៍ មីសែល រ៉ូប៊ីលឡាដ ចំណាយពេល ៦ ឆ្នាំដើម្បីបញ្ចប់ការផលិតរថយន្ដដ៏មហិមារបស់ខ្លួន ដែលអាចដំណើរការបានពេញលេញដោយមានឈ្មោះថា Umbrella on Wheels (ឆត្រលើកង់)។ វាជារថយន្ដផលិតឡើងដោយដៃសុទ្ធសាធ និងស្ទើរតែប្រើឈើពេញមួយតួរថយន្ដទៅហើយ។
បុរសដែលនាំបង្កើតរថយន្ដក្នុងក្ដីស្រមៃចេញជារូបនេះបានថ្លែងប្រាប់ AFP ថា គម្របមុខឆ្នូតៗត្រូវបានឆ្លាក់ឡើងពីក្ដារមួយបន្ទះ ហើយឆ្អឹងដំបូល ២២ ឆ្នូតរចនាឡើងដោយប្រើពន្លាក និងក្រដាសខាត់។
រថយន្ដ 2CV ដែលមានន័យថា «deuxchevaux» ឬថាមពលកម្លាំងពីរសេះ បានចេញលក់ឆ្នាំ ១៩៤៨ ខណៈ Citroen ប្រជែងនឹងម៉ូដែល Beetle របស់ Volkswagen។
លោក រ៉ូប៊ីលឡាដ បានរក្សាទុករថយន្ដឈើដ៏ភ្លឺរលោងរបស់ខ្លួនក្នុងរោងជាងនៅភាគកណ្ដាលប្រទេស ជាមួយនឹងគំរូគ្រោង ១៥ គ្រឿងផ្សេងទៀត។ រថយន្ដឈើនេះបំពាក់ជាមួយម៉ាស៊ីនហ្ស៊ីនរបស់ម៉ូដែលចុងក្រោយ 3CV ដែលវាមានថាមពលបន្ថែមលើសំណង់តួរថយន្ដឈើ។
<figure>
<figcaption>សូម្បីតែចង្កូត និងកៅអី ក៏ធ្វើពីឈើសុទ្ធដែរ។ AFP</figcaption></figure>
គ្រោងតួឈើរបស់វាត្រូវបានការពារពីកម្ដៅម៉ាស៊ីនដោយប្រើស្រទាប់អាំងសូលីន។ ក្រៅពីម៉ាស៊ីនគ្រោងដែក កង់ និងចង្កៀងមុខ និងគ្រឿងបន្លាស់ អ្វីៗទាំងអស់គឺជាស្នាដៃលោកច្នៃផលិតទាំងស្រុង។
លោកនិយាយថា៖ «គម្របភក់ធ្វើឡើងពីឈើ មិនខុសពីកៅអីរថយន្ដ ដែលភ្ជាប់មកជាមួយខ្នើយប្រកបដោយផាសុកភាពឡើយ»។
រថយន្ដឈើនៅមិនទាន់ឆ្លងកាត់ដំណាក់ត្រួតពិនិត្យបច្ចេកទេសនោះទេ តែវាក៏បានទាក់ចិត្ដមនុស្សម្នាច្រើននាក់ហើយដែរ។ យ៉ាងណាមិញ លោក រ៉ូប៊ីលឡាដ មិនលក់វាទេ ដោយចាត់ទុករថយន្ដដំបូងនេះថា «វាជាស្នាដៃក្រោយខ្ញុំលែងនៅលើលោកនេះ»។
លោកមានក្ដីសុបិនចង់តាំងបង្ហាញរថយន្ដឈើនៅសាលវិចិត្រ ឬចង់ឃើញវាតាមកញ្ចក់ទូរទស្សន៍ ឬភាពយន្ដ។ ជាងឈើចាប់អាជីពតាំងពីអាយុ ១៤ ឆ្នាំរូបនេះ បានចាប់ផ្ដើមផលិតរថយន្ដចម្លងពីឈើនេះតាំងពីទសវត្សរ៍ទី ៩០។
លោកបានឈ្នះពានជាច្រើន រួមទាំង ម៉ូតូ Harley Davidson និងរថយន្ដធុនតូចដែលប្រើពេលជាង ៥០០ ម៉ោង។ លោកបញ្ជាក់ថា៖ «គ្រាន់តែផលិតកង់ឈើមួយ ខ្ញុំត្រូវការពេលពេញមួយថ្ងៃ។ ទោះយ៉ាងណាខ្ញុំតែងតែព្យាយាមស្វែងរកអ្វីថ្មីប្លែក»៕
