អ្នកមានក្លិនក្លៀកឈប់ភ័យ! ឱសថបុរាណធម្មជាតិទាំងនេះ អាចជួយកម្ចាត់បានយ៉ាងល្អ!

អាកាសធាតុប្រទេសយើង គឺស្ថិតនៅក្នុងតំបន់ត្រូពិចក្តៅហើយសើម ដែលជាកត្តាមួយធ្វើឱ្យមនុស្សជាច្រើនមានក្លិនខ្លួននារដូវក្តៅ។ ដោយក្លិននេះគឺបណ្តាលមកពីការប្រមូលផ្តុំនៃបាក់តេរីកើតចេញពីញើស មេរោគផ្សិតនៅលើស្បែក និងលើខោអាវជាដើម។ ដូច្នេះអ្នកពិតជាកង្វល់មិនខាន នៅពេលនៅក្បែរអ្នកដទៃ ពិសេសគឺគូស្នេហ៍ ប៉ុន្តែពេលនេះក្លិនខ្លួនលែងជាបញ្ហាទៀតហើយ ដោយគ្រាន់តែប្រើឱសថបុរាណដូចខាងក្រោមនេះ៖

១) ខ្ញី៖ មានគុណសម្បត្តិប្រឆាំងបាក់តេរី ជួយទប់ស្កាត់ការរីកលូតលាស់នៃបាក់តេរីនៅលើស្បែក។ ងាយៗដោយគ្រាន់តែកិនខ្ញីស្ងួតឱ្យក្លាយទៅជាម្ស៉ៅ ហើយនាំយកមកផ្សំជាមួយម្ស៉ៅ Baking Soda ក្នុងបរិមាណស្មើគ្នា ធ្វើជាម្ស៉ៅ យកមក លាបនៅក្លៀក និងគន្លាក់ដៃជើង ជាការស្រេច។ ដូច្នេះវាអាចជួយរារាំងបាក់តេរី និងជួយកាត់បន្ថយក្លិនខ្លួនបានយ៉ាងងាយ។
<figure>
<figcaption>ខ្ញីមានគុណសម្បត្តិប្រឆាំងបាក់តេរី ជួយទប់ស្កាត់ការរីកលូតលាស់នៃបាក់តេរី</figcaption></figure>
២) រមៀត៖ មានជាតិប្រេងក្រអូបប្រឆាំងនឹងបាក់តេរី និងកម្ចាត់បាក់តេរីយ៉ាងល្អ ជួយកាត់បន្ថយកន្ទួល និងជួយស្បែកផងដែរ។ វិធីប្រើប្រាស់គឺនាំយកម្ស៉ៅរមៀតស្ងួតមកលាបក្លៀក ឬកន្លែងដែលមានមេរោគ នឹងជួយឱ្យក្លិនស្អុយនៅលើខ្លួនបាត់ទៅមិនខាន។
<figure>
<figcaption>ម្ស៉ៅរមៀត</figcaption></figure>
៣) ប្រេងជីអង្គាម៖ ប្រេងដែលចម្រាញ់ចេញពីស្លឹកជីអង្កាម មានគុណសម្បត្តិកម្ចាត់ក្លិនតាមបែបធម្មជាតិ។ គួរយកប្រេងនេះប្រហែល២-៣តំណក់ បន្តក់ចូលក្នុងអាងងូតទឹក ហើយត្រាំខ្លួនរយៈពេល៥នាទី ឬប្រើស្លឹកជីអង្កាមស្រស់១ដៃស្ងោរជាមួយទឹក១ពែង ហើយលាយជាមួយទឹកត្រជាក់ដើម្បីងូតក៏បានដែរ។

៤) ស្លឹកម្លូ៖ ជួយសម្លាប់មេរោគ និងរារាំងការលូតលាស់នៃបាក់តេរីជាច្រើន។ ដោយប្រើស្លឹកវាមកញីក្លៀក ក្រោយងូតទឹករួច ទុកចោលមួយសន្ទុះចាំលាងចេញជាការស្រេច។
<figure>
<figcaption>ស្លឹកម្លូ</figcaption></figure>
៥) ស្លឹកត្របែក៖ ក្រៅពីអាចជួយបំបាត់ក្លិនមាត់ហើយ ថែមទាំងអាចជួយបំបាត់ក្លិនខ្លួនទៀត ដោយគ្រាន់តែយកស្លឹកត្របែកស្រស់ប្រហែល១០សន្លឹក មកបុកឱ្យហ្មត់ ហើយលាបក្លៀក ទុកចោល៥នាទី រួចសឹមងូតទឹកចេញ។

៦) ស្លឹកបាស៖ អាចប្រឆាំងបាក់តេរីបានយ៉ាងល្អ ដោយនាំយកស្លឹកស្រស់ប្រហែល ១-២ ក្តាប់ដៃ ទៅបុកឱ្យល្អិត ហើយលាយជាមួយកំបោរ លាបក្លៀកទុកចោលមួយភ្លែតចាំលាងចេញ។ គួរធ្វើបែបនេះពេញមួយសប្តាហ៍ ដើម្បីជួយកម្ចាត់ក្លិនខ្លួនបានយ៉ាងល្អប្រសើរ។
<figure>
<figcaption>ស្លឹកបាស</figcaption></figure>
៧) សំបកមង្ឃុត៖ អាចជួយកាត់បន្ថយការរលាក និងកម្ចាត់បាក់តេរីបានយ៉ាងងាយ។ ដោយគ្រាន់តែយកសំបកផ្លែមង្ឃុត១ចំណិតស្ងោររំងាស់ឱ្យរីងសល់បន្តិច ចាំត្រងយកកាកវាមកលាយជាមួយទឹក២០លីត្រ យកទៅងូតជាការស្រេច។

៨) ទឹកអំពិលទុំ៖ មានប្រសិទ្ធិភាពលុបបំបាត់ក្លិនខ្លួន និងជួយកម្ចាត់កោសិកាស្បែកដែលងាប់ចោលផងដែរ។ ងាយធ្វើដោយគ្រាន់តែច្របាច់អំពិលជាមួយទឹក ហើយត្រង់យកកាកវាចេញ ប្រើទឹកអំពិលទុំនេះ ដុសខ្លួនជំនួសសាប៊ូពេលងូតទឹក ពិសេសដុសក្លៀក និងតំបន់សំខាន់ៗនោះជាការស្រេច។
<figure>
<figcaption>ទឹកអំពិលទុំ</figcaption></figure>
៩) ក្រូចឆ្មារ៖ ជាតិអាស៊ីតនៅក្នុងទឹកក្រូចឆ្មារ អាចជួយកាត់បន្ថយបាក់តេរីយ៉ាងប្រសើរ។ វិធីប្រើដោយគ្រាន់យក ក្រូចឆ្មារជា២ចំណិត ហើយលាយជាមួយទឹកស្អាតពេលងូតទឹកជាការស្រេច។ ចំពោះអ្នកដែលមុត ឬមានដំបៅផ្សេងៗនៅលើរាងកាយ មិនត្រូវប្រើវិធីនេះទេ ព្រោះវានាំឱ្យក្រហាយដល់ស្បែកបាន។
<figure>
<figcaption>ក្រូចឆ្មារ</figcaption></figure>
ដូច្នេះប្រសិនបើអ្នកមានបញ្ហាក្លិនខ្លួន ក្លិនក្លៀក សូមកុំភ្លេចសាកល្បងប្រើរបស់ទាំងនេះ ដើម្បីទទួលបាននូវក្លិនខ្លួនក្រអូបៗគួរឱ្យចង់នៅក្បែរ៕

Source www.khmerload.com