<figure>
</figure>
<figure>
<figcaption>គម្រោងហាងផ្សារកុងតឺន័រ ករុណា ពេជ្រ នៅសៀមរាប។ ហ្វេសប៊ុក</figcaption></figure>
ភ្នំពេញៈ ក្រោយពីបានភ្ជាប់ពាក្យជាមួយនឹងនិស្សិតស្រីកំពុងតែសិក្សាជិតបញ្ចប់ថ្នាក់បរិញ្ញាបត្រ និងបានដាក់គោលដៅដឹកដៃគូដណ្តឹងចូលផ្ទឹមក្នុងរោងជ័យរួចហើយនៅក្នុងឆ្នាំក្រោយនោះ តារាចម្រៀងប្រុសរូបសង្ហា ជាអ្នកចាត់ការទូទៅថ្មីរបស់ផលិតកម្មថោន លោក ករុណា ពេជ្រ ក៏បានពង្រីកមុខរបរនៅក្រៅសិល្បៈជាហូរហែ ខណៈថ្មីៗនេះលោកក៏ត្រៀមដាក់ទុនប្រមាណ បីបួន ម៉ឺន ដុល្លារ បើកហាងលក់ស៊ុប និងម៉ាតលក់ភេសជ្ជៈ ២៤ ម៉ោង នៅផ្សារកុងតឺន័រថ្មី ស្ថិតនៅក្នុងទឹកដីនៃខេត្តសៀមរាប។
នេះបើតាមសារ និងរូបភាពនៃគម្រោងបើកហាងថ្មីដែល បង្ហោះតាមហ្វេសប៊ុកលោកថា៖ «ខ្ញុំបាទត្រៀមបើក Mart នៅសៀមរាប ដូច្នេះខ្ញុំបាទត្រូវការពិភាក្សា និងជ្រើសរើស ផលិតផលដាក់ក្នុង Mart ដែលបើកនៅដើមខែ ១១ នេះហើយ! ហើយត្រូវការបុគ្គលិក ៤ នាក់ ដែលមានបទពិសោធចេះគិតលុយ។ អាចទាក់ទងមក Inbox របស់ខ្ញុំផ្ទាល់» និងសារប្រាប់ពីទីតាំងហាងនោះថា៖ «Container Drink Mart ទីតាំងនៅក្នុងផ្សារនៃខេត្តសៀមរាប កុងតឺន័រ ជួរជាមួយនឹងហាងស្រីខួច លក់ស៊ុប នៅជាប់សណ្ឋាគារ Sofitel បណ្តោយផ្លូវហ្សាដឺហ្គោល ទិញនៅហ្នឹង ផឹកនៅហ្នឹង ស្តាប់ភ្លេងនៅហ្នឹង!»។
លោក ករុណា ពេជ្រ ដែលបានភ្ជាប់ពាក្យជាមួយនឹងនិស្សិតស្រី ខណៈពីប្រភពអ្នកស្និទ្ធខាងស្រីបានទម្លាយថាជាគ្រួសារមានឋានៈមុខមាត់ក្នុងសង្គម និងទ្រព្យធនដ៏ស្តុកស្តម្ភ ហើយទំនាក់ទំនងស្នេហារវាងលោក និងនារីជាគូដណ្តឹងមានឈ្មោះហៅក្រៅថា ស្រីកា នោះ គឺចាស់ទុំទាំងសងខាងបានជួបគ្នានៅក្នុងពិធីចូលសួរនាំ នាពេលកន្លងមក និងធ្លាប់បង្ហើបថា នឹងត្រូវចូលរោងការនៅក្នុងឆ្នាំ ២០១៨ ខាងមុខ ក៏បន្ថែមឲ្យដឹងដែរថា៖ «បាទជាការពិតមែន គឺខ្ញុំកំពុងតែត្រៀមបើកហាងនៅឯខេត្តសៀមរាបមែន! ដោយបានចំណាយដើមទុនប្រមាណជា បីបួន ម៉ឺនដុល្លារ ព្រោះខ្ញុំយល់ឃើញថា នៅខេត្តសៀមរាប គឺជាតំបន់ទាក់ទាញទេសចរដ៏សំខាន់មួយនាពេលបច្ចុប្បន្ន ក៏សាកល្បងដាក់ទុនរកស៊ីរបរមួយនេះទៀត»។
ក្រៅពីនេះ គេបានដឹងដែរថាតារាទ្រព្យស្ដុកមានផ្ទះវីឡាតម្លៃ ៤១ ម៉ឺនដុល្លារ និងជិះរថយន្តទំនើបកប់ស៊េរី និងត្រូវបានគេស្គាល់ថា គឺជាតារាចម្រៀងប្រុសដែលតែងតែចេញមុខមាត់ដោយបើកចំហនៅក្នុងការឃោសនាបក្សកាន់អំណាចយ៉ាងគគ្រឹកគគ្រេងពីឆ្នាំ ២០១៣ មកក៏ព្រោះតែ លោកមានតួនាទីជាជំនួយការដ៏ជំនិតរបស់កូនប្រុសលោកនាយករដ្ឋមន្ត្រីនោះ ក៏មានមុខរបរបើកទទួលរៀបចំតុបតែងនូវផ្កាស្រស់ៗសម្រាប់ក្នុងពិធីមង្គលការ ពិធីជប់លៀង និងពិធីបុណ្យនានាផងដែរនៅក្រុងភ្នំពេញក្រៅពីការងារសិល្បៈអតីតជាតារាចម្រៀង និងបច្ចុប្បន្ន ជាអ្នកចាត់ការទូទៅនៅក្នុងផលិតកម្មថោន៕
Posted from my blog with SteemPress : http://khmernewsshare.com/archives/5192