ភ្នំពេញ៖ ក្រោយល្បីឈ្មោះនៅក្នុងពិភពកំប្លែង ហើយបានលែងលះប្ដីក្លាយជាអ្នកមេម៉ាយចាយសម្រស់ អ្នកនាង ស្រេង សុកាន់ដា ហៅ ខ្ញុង បានប៉ះនឹងព្យុះព័ត៌មានថា បានបង្កាត់ភ្លើងស្នេហ៍ក្រៅឆាកជាមួយ នាយ ពែកមី។
ប៉ុន្តែអ្វីដែលគួរឲ្យភ្ញាក់ផ្អើលនោះថ្មីៗនេះ ស្រាប់តែសែនព្រេនស្ងាត់ៗជាមួយតារាកំប្លែងរួមក្រុមគឺនាយ កៃ ដ ជាគូអនាគត ខណៈដែលនាយ កៃដ អះអាងថានឹងគ្រោងរៀបការទ្រង់ទ្រាយធំនាពេលខាងមុខទៀត និង មិនគិតពីអតីតកាលរបស់ភរិយានោះទេ។
ស្ទើរតែមិនគួរឲ្យជឿអ្នកនាង ខ្ញុង ដែលតែងរងនូវពាក្យខ្សឹបខ្សៀវថានាងព្រមធ្វើប្រពន្ធទី ២ របស់ពែកមី និងប្រចណ្ឌហួងហែង ពែកមី ខ្លាំងផងនោះ ស្រាប់តែសម្រេចចិត្តមកសែនព្រេនជាមួយនាយ កៃ ដ ដែលជាតារាកំប្លែងរួមក្រុម កាលពីថ្ងៃទី ០៣ ខែកក្កដាឆ្នាំ ២០១៧ កន្លងទៅដោយពេលនេះពួកគេបានក្លាយជាប្ដីប្រពន្ធកសាងសុភមង្គលរួមគ្នាស្របពេលដែលនាយ កៃ ដ ក៏បានលែងលះប្រពន្ធដើមដាច់ស្រេច។
ដំណឹងអ្នកនាង ខ្ញុង សែនព្រេនយកនាយ កៃ ដ ធ្វើជាប្តី ក៏មានដំណឹងផ្ទុះផងដែរថាក៏មានការអាក់អន់ស្រពន់ចិត្ត ពីនាយ ពែកមី ចំពោះអ្នកនាង ខ្ញុង ផងដែរ ដែលអ្នកនាង ខ្ញុង ក្លាយជាភរិយាពេញសិទ្ធ នាយ កៃ ដ បើទោះជារឿយៗនាយ ពែកមី តែងបដិសេធថារូបលោកមិនមានជាប់ពាក់ព័ន្ធស្នេហាក្រៅឆាកជាមួយអ្នកនាង ខ្ញុង ក៏ដោយ។
ជុំវិញការអាក់អន់ចិត្តនោះក៏មានអ្នកសិល្បៈបង្ហើបដែរថា៖ «ពែកមី ប្រាកដជាអត់ចិត្ត និង ខ្ញុង ហើយដែលយកប្តីណាមិនយក យកអ្នកកំប្លែងក្នុងទ្រនំ ស៊ីធីអ៊ិន ដូចគ្នាដែលកន្លងមកមិនមានរឿងអ្វីដែលបិទបាំងគ្នាផងហ្នឹង»។
តែយ៉ាងណា នាយ កៃ ដ បានសារភាពថា នាយ និងអ្នកនាង ខ្ញុង ពិតជាបានសែនព្រេនរួមរស់ជាមួយគ្នាជាប្ដីប្រពន្ធមែន បន្ទាប់ពីបានពិសោធស្នេហ៍ជាង ២ ឆ្នាំ និងទិញផ្ទះរួមគ្នា។
<figure>
<figcaption>អ្នកនាង ខ្ញុង និងនាយ ពែកមី។ រូបថត ភ្នំពេញ ប៉ុស្ដិ៍</figcaption></figure>
មុននោះនាយ កៃ ដ អះអាងថា៖ ខ្ញុំពិតស្រលាញ់អ្នកនាង ខ្ញុង យ៉ាងពិតប្រាកដ ទើបខ្ញុំសម្រេចចិត្តចាប់ដៃកសាងសុភមង្គលរួមគ្នា ហើយក៏មិនខ្វល់ពីរឿងអតីតកាលរបស់គាត់ដែរ»។
ទន្ទឹមនឹងការបើកចិត្តទូលាយដល់មនុស្សដែលខ្លួនស្រឡាញ់នោះ នាយ កៃ ដ ក៏បានបញ្ជាក់ដែរថា៖ « ខ្ញុំសម្រេចចិត្តសាងសុភមង្គលជាមួយគាត់ (ខ្ញុង) ដោយគិតពីបច្ចុប្បន្ន និងទៅអនាគត ហើយខ្ញុំក៏គិតគ្នាហើយដែរ ពួកយើងគ្រោងរៀបការជាទ្រង់ទ្រាយធំនាពេលខាងមុខទៀតផង»។
នាយ កៃ ដ បន្ថែមថា៖ «ពួកយើងកំពុងតែប្រឹងរកស៊ីសិន ខណៈដែលមានគម្រោងទៅសម្ដែងរួមគ្នានៅសហរដ្ឋអាមេរិកក្នុងពេលឆាប់ៗផងដែរ។ ដូច្នេះពេលត្រឡប់មកពីអាមេរិកអាចនឹងរៀបចំមង្គលការជាទ្រង់ទ្រាយធំដុំ»។
នាយ កៃ ដ បញ្ជាក់ថានាយបានជ្រះស្រឡះជាមួយប្រពន្ធដើមហើយ ហើយក្រោយពេលចងសម្ព័ន្ធស្នេហ៍ជាមួយអ្នកនាង ខ្ញុង អាជីពសិល្បៈរបស់នាយកាន់តែស្ទុះឡើង មានទីផ្សារកាន់តែជោគជាំ ដែលអាចរកចំណូលបានយ៉ាងច្រើនគួរសម ហើយលោកបានបង្ហាញពីគោលជំហរថានឹងថែរក្សាចំណងស្នេហ៍នេះជាអមតៈ៕
