ប្រទេសចំនួន ៣ នៅអាស៊ាន គឺវៀតណាម ថៃ និងម៉ាឡេស៊ី កំពុងរងការវាយប្រហារពីខ្យល់ព្យុះ និងទឹកជំនន់។ ចំណែកប្រទេសកម្ពុជា គ្រាន់តែរងផលប៉ះពាល់ ដោយមិនធ្ងន់ធ្ងរដូចប្រទេសទាំង៣ ខាងលើនេះទេ។
<figure>
</figure>
១. វៀតណាម
ប្រទេសវៀតណាម កំពុងរងការវាយប្រហារពីព្យុះ ដំរី បណ្ដាលឲ្យមនុស្សយ៉ាងតិច ៤៤នាក់ស្លាប់ និងបាត់ខ្លួនរាប់សិបនាក់ផ្សេងទៀត។ ឯផ្ទះសម្បែងរាប់រយខ្នង ត្រូវបំផ្លាញខ្ទេចខ្ទី។ នៅតាមដងផ្លូវ ស្ទើរក្លាយជាព្រែកទៅហើយ ដែលធ្វើឲ្យប្រជាជនពិបាកធ្វើដំណើរយ៉ាងខ្លាំង រហូតប្រើទូក ជំនួសរថយន្ត-ម៉ូតូ។ ព្យុះ ដំរី នេះ ចាប់ផ្ដើមបោកបក់លើវៀតណាម តាំងពីព្រឹកថ្ងៃសុក្រ។
២. ថៃ
ប្រទេសថៃជាប់ព្រំដែនកម្ពុជា ក៏កំពុងរងឥទ្ធិពលខ្លាំងពីព្យុះដែរ ដោយធ្វើឲ្យមានភ្លៀងធ្លាក់យ៉ាងជោគជាំ និងលិចផ្លូវសំខាន់ៗមួយចំនួន។ អាជ្ញាធរបានប្រកាសឲ្យប្រជាជននៅខេត្តភាគខាងត្បូង ប្រុងប្រយ័ត្នខ្ពស់ ព្រោះអាចនឹងមានជំនន់ភ្លាមៗ ពីទឹកភ្លៀង ហើយវាអាចបង្កគ្រោះថ្នាក់ដល់ជីវិតផងដែរ។
៣. ម៉ាឡេស៊ី
រដ្ឋ Penang របស់ប្រទេសម៉ាឡេស៊ី កំពុងរងគ្រោះដោយទឹកជំនន់យ៉ាងខ្លាំង លិចស្ទើរគ្រប់ទិសទី ព្រោះទឹកភ្លៀងធ្លាក់មិនឈប់។ មនុស្ស ៧នាក់ហើយ បានស្លាប់ដោយសារជំនន់នេះ និងប៉ះពាល់ប្រជាជនជាច្រើនគ្រួសារ។ ចំណែកសិស្សសាលា ត្រូវដើរលុយទឹក ដើម្បីទៅប្រឡងតាមកាលវិភាគកំណត់។
ចំពោះប្រទេសកម្ពុជា ក្រសួងធនធានទឹក និងឧតុនិយមបានប្រកាសថា នឹងរងឥទ្ធិពលពីព្យុះ ដំរី ដោយមានខ្យល់ និងភ្លៀងធ្លាក់ ចាប់ពីថ្ងៃទី៤ ដល់ថ្ងៃទី៦៕
Posted from my blog with SteemPress : http://khmernewsshare.com/archives/6069