រាជធានីភ្នំពេញ ៖ ជនសង្ស័យម្នាក់ឃើញម្ចាស់ម៉ូតូទើបតែទិញម៉ូតូថ្មីមកដល់កំពុងតែសែនភ្លេចខ្លួន ដាក់កូនសោជាប់ម៉ូតូ ក៏លួចជិះរត់គេចខ្លួន ត្រូវម្ចាស់តាមទាន់ចាប់បានវាយប្រគល់ទៅឲ្យសមត្ថកិច្ច ហេតុការណ៍នេះបានកើតឡើងកាលពីវេលាម៉ោង០៦ល្ងាច ថ្ងៃទី២៦ ខែវិច្ឆិកា ឆ្នាំ២០១៧ តាមបណ្ដោយផ្លូវជាតិលេខ៥ នៅចំណុចក្បែរនិងស្ថានីយ៍ទូរទស្សន៍CTN ស្ថិតនៅក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឬស្សីកែវ ។
<figure>
</figure>
ជនរងគ្រោះមានឈ្មោះ ហ៊ង វណ្ណៈ ភេទប្រុស អាយុ២២ឆ្នាំ មុខរបកម្មកររោងចក្រ មានទីលំនៅបន្ទប់ជួលក្រុមទី៨ ផ្លូវជាតិលេខ៥ ក្រុមទី៨ ភូមិស្ពានខ្ពស់ សង្កាត់គីឡូម៉ែត្រ៦ ។ ចំណែកឯជនសង្ស័យជាចោរឈ្មោះ ណន ចាន់ថន ភេទប្រុស អាយុ២៨ឆ្នាំ មានទីលំនៅបន្ទប់ជួលក្រុមទី៨ ភូមិស្ពានខ្ពស់ សង្កាត់គីម៉ែត្រលេខ៦ មុខរបរមិនពិតប្រាកដ ។
តាមប្រព័ត៌មានពីជនរងគ្រោះបានឲ្យដឹងថា មុនពេលកើតហេតុ គឺគាត់ទើបតែទិញម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរី២០១៨ អត់ទាន់មានស្លាកលេខផង ហើយទិញផ្លែឈើយកមកសែនរួច ក៏ដាក់ម៉ូតូនៅជិតខ្លួន ហើយអង្គុយផឹកស៊ីជួបជុំបងប្អូន ភ្លេចខ្លួនមួយភ្លេតក៏ស្រាប់តែមានជនសង្ស័យម្នាក់ជាអ្នករស់នៅជិតបន្ទប់គាត់ បានឆ្លៀតឱកាសលួចយកម៉ូតូដែលមានកូនសោនៅជាប់ម៉ូតូជិះរត់គេចខ្លួនបានសម្រេច ខណៈពេលជិះរត់គេចខ្លួនទៅដល់មុខស្ថានីយ៍ទូរទស្សន៍CTN ក៏ត្រូវជនរងគ្រោះដេញតាមស្រែកឆោឡោផ្អើលទៅដល់សមត្ថកិច្ចប៉ុស្តិ៍ឬស្សីកែវ មុខផ្ទះវីង ត្រូវបានប្រជាពលរដ្ឋព្រួតវាយមួយដៃវាយមួយជើង បណ្ដាលឲ្យរងរបួសយ៉ាងដំណំ រួចប្រគល់ទៅឲ្យសមត្ថកិច្ចប៉ុស្តិ៍គីឡូម៉ែត្រលេខ៦ យកទៅសួរនាំប៉ុស្តិ៍គីឡូម៉ែត្រលេខ៦ ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងដើម្បីឲ្យសមត្ថកិច្ចចាត់ការជនសង្ស័យទៅតាមនីតិវិធី ៕
<figure>
</figure>
<figure>
</figure>
<figure>
</figure>
Source khempire.com
Posted from my blog with SteemPress : http://khmernewsshare.com/archives/7401