មានឃ្លាមួយត្រូវបានលើកឡើងដោយលោក Wayne Dyer ដូច្នេះថា៖ “អ្នកមិនអាចក្លាយជាមនុស្សឯកាបានទេ បើសិនជាអ្នកពេញចិត្តមនុស្សដែលអ្នកនៅឯកាជាមួយ”។ មនុស្សម្នាក់ៗនៅលើលោកនេះសុទ្ធតែមានសក្ដានុពលដែលបង្កប់នូវក្នុងខ្លួនម្នាក់ៗរៀងៗខ្លួន។ សង្គមមួយដែលពោរពេញមនុស្សដែលមិនស្គាល់ថាខ្លួនឯងជានរណាយ៉ាងពិតប្រាកដ ខ្លួនឯងមានសក្ដានុពលអ្វី អាចសម្រេចភាពអស្ចារ្យអ្វីខ្លះបាន នោះពួកគេនឹងស្វះស្វែងរកភាពអស្ចារ្យពីខាងក្រៅ ដើម្បីមកបំពេញតម្លៃខាងក្នុងដែលមានតែភាពទទេស្អាតនេះឯង។
អាល់ប៊ឺត អាញស្តាញ ធ្លាប់និយាយថា៖ “ចូរនៅតែម្នាក់ឯង ព្រោះវានឹងទុកពេលវេលាសម្រាប់ឲ្យអ្នកសង្ស័យសួរនាំ ស្វែងរកការពិត មានការងឿងឆ្ងល់ និងជាពិសេសគឺធ្វើឲ្យជីវិតរបស់អ្នកមានតម្លៃខ្លឹមសារសម្រាប់រស់នៅ”។ បើអ្នកកាន់តែស្ងប់ស្ងាត់ នោះអ្នកនឹងស្ដាប់ឮកាន់តែច្បាស់។ បុគ្គលដែលពោរពេញដោយគំនិតដ៏អស្ចារ្យទាំងឡាយ សុទ្ធតែជាមនុស្សដែលពូកែសង្កេត។
តាមពិតទៅមនុស្សយើងម្នាក់ៗរៀនសូត្របានច្រើនបំផុតពីខ្លួនឯង គឺតាមរយៈការស្វែងយល់អំពីខ្លួនឯង អ្នកជានរណា តើការគិតរបស់អ្នកមានលក្ខណៈយ៉ាងដូចម្ដេចនិងមានទំនោរទៅរកអ្វី ហើយចាប់អារម្មណ៍ជ្រុងបែបណានៃសាច់រឿង វិជ្ជមានឬអវិជ្ជមាន តើរបៀបនៃការគិតដែលអ្នកតែងមានកន្លងមកនេះ បានជះឥទ្ធិពលនិងបង្កជាដើមហេតុនៃស្ថានការណ៍ទាំងឡាយនៅក្នុងជីវិតអ្នកយ៉ាងណាខ្លះ។
សូក្រាតដែលជាទស្សនវិទូដ៏ល្បីល្បាញបំផុតមួយប្រចាំសម័យក្រិកបុរាណ ធ្លាប់និយាយថា៖ “ចូរប្រុងប្រយ័ត្នជាមួយភាពឥតខ្លឹមសារដែលការរវល់មមាញឹកតបស្នងមកឲ្យជីវិតវិញ”។ មនុស្សរវល់មិនមែនសុទ្ធតែជាមនុស្សដែលមានជីវិតរស់នៅនិងការងាររបស់ខ្លួនប្រកបដោយគុណភាព ប្រសិទ្ធភាព និងសុភមង្គលនោះទេ។ ព្រោះអ្នកត្រូវជជីកសួរបន្តទៀតថា តើពួកគេរវល់អ្វី ដែលនេះទើបអាចបញ្ជាក់ពីគុណភាពជីវិតរស់នៅរបស់មនុស្សម្នាក់បាន។
មនុស្សដែលមានជីវិតរស់នៅដោយខ្លឹមសារនិងសុភមង្គល គឺជាមនុស្សដែលដឹងថាអ្វីសំខាន់និងអ្វីមិនសំខាន់ អ្វីមានប្រយោជន៍និងអ្វីឥតប្រយោជន៍សម្រាប់ខ្លួនឯង រួចទើបពួកគេបូជាពេលវេលានិងការខិតខំរបស់ខ្លួនតម្រង់ទៅរកកិច្ចការទាំងឡាយណាដែលសំខាន់និងមានប្រយោជន៍អស់ទាំងនោះ ព្រោះមនុស្សប្រភេទនេះដឹងច្បាស់ថាដើម្បីផ្លាស់ប្ដូរពិភពលោកខាងក្រៅបាន ពួកគេត្រូវដុសខាត់និងផ្លាស់ប្ដូរខ្លួនឯងឲ្យបានល្អប្រសើរជាមុនសិន ពោលគឺត្រូវយកឈ្នះលើខ្លួនឯងជាមុន ទើបពួកគេអាចយកឈ្នះចិត្តមនុស្សនៅខាងក្រៅនិងស្ថានការណ៍លំបាកៗដែលមករារាំងពួកគេនៅក្នុងដំណើរឆ្ពោះទៅសម្រេចគោលដៅបាន៕
Posted from my blog with SteemPress : http://khmernewsshare.com/archives/6813