អតីតតារាចម្រៀងរ៉ុក ឈុំ រតនា ផុតដង្ហើមទាំងធ្លាយដំណឹងជិតចូលរោងការ
ភ្នំពេញៈ ខណៈអតីតបេក្ខជនចូលរួមកម្មវិធីប្រឡង Cambodian Idol រដូវកាលទី ២ លោក ឈុំ រ៉ូបឺត ទើបតែបង្ហោះសារទុក្ខសោកដ៏ក្រៀមក្រំដោយសារបងប្រុសបង្កើតឈ្មោះ ឈុំ រតនា ធ្លាប់ជាតារាចម្រៀងផលិតកម្មរ៉ុកជាម្ចាស់បទ «កាលីបអី» បានទទួលមរណភាព ពីម្សិលមិញម៉ោង ៣ និង ១០ នាទី ទៀបភ្លឺ នៅមន្ទីរពេទ្យមិត្តភាពខ្មែរសូវៀត (ពេទ្យរុស្ស៊ី) នោះ ក៏មានការទម្លាយពីនារីដែលអះអាងថា ជាប្អូនស្រីរបស់សពផងដែរថា នាងអស់ឱកាសស្លៀករូបចូលរួមមង្គលការបងប្រុសសំណព្វហើយ។
បើតាមគណនីហ្វេសប៊ុក មានឈ្មោះថា FiFi Na ដែលអះអាងថា ខ្លួនជាប្អូនស្រីរបស់សពដែរនោះបានបង្ហោះសារថា៖ «សូមឲ្យបងប្រុសទៅកាន់សុគតិភព បងមិនមិនគួរអាយុខ្លីទេ!សល់តែមួយខែទៀតបងចូលរោងការហើយ! ម៉េចក៏ទៅចោលពួកយើងចឹង ប្អូនត្រៀមរ៉ូបសម្រាប់ស្លៀកពាក់ក្នុងថ្ងៃការបងប្រុសហើយ ម៉េចក៏មានរឿងចឹងឡើង!»។
កាន់តែភ្ញាក់ផ្ញើលជាងនេះ និងគួរឲ្យអាណោចអាធមខ្លាំងទៅទៀតនោះ គឺការស្លាប់របស់តារាចម្រៀង ឈុំ រតនា ដែលត្រូវជាបងប្រុសអតីតបេក្ខជនចូលរួមកម្មវិធីប្រឡង Cambodian Idol រដូវកាលទី ២ ឆ្នាំ ២០១៧ លោក ឈុំ រ៉ូបឺត នោះ គឺជាការបាត់បង់សមាជិកក្រុមគ្រួសារជាលើកទី ៣ ហើយនៅក្នុងរយៈពេលតែមួយឆ្នាំនេះ។
គណនីហ្វេសប៊ុករបស់នារីជាប្អូនស្រីបានលើកឡើងថា៖ «មិនដល់មួយឆ្នាំផង គ្រួសារញ៉ុម ស្លាប់ដល់ទៅបីនាក់ ពិបាកចិត្តណាស់! ប្អូនប្រុសញ៉ុមទើបស្លាប់មិនទាន់កាត់ចិត្តបានផង!លូវបងប្រុសទៀត គ្រួសារញ៉ុមខុសអី?»។
បើយោងតាមប្រភពឲ្យដឹងពីប្អូនប្រុសនៃសពគឺលោកអតីតតបេក្ខជនចូលរួមកម្មវិធីប្រឡង Cambodian Idol រដូវកាលទី២ លោក ឈុំ រ៉ូបឺត បានឲ្យដឹងពីពេលវេលានៃមរណភាពសព ដែលជាតារាចម្រៀងប្រុសម្ចាស់បទ «កាលីបអី» នៅឯមន្ទីរពេទ្យមិត្តភាពខ្មែរសូវៀតថា៖ «បងប្រុសខ្ញុំគាត់បានផុតដង្ហើមហើយ 3:10am ខ្ញុំលែងមានបងប្រុសហៅនឹងគេទៀតហើយ love u (forever brother)»!។
យ៉ាងណាមិញ ក៏មិនមានការទម្លាយលម្អិតពីដើមចមនៃមរណភាពរបស់តារាចម្រៀង ឈុំ រតនា ដែរ ក្រៅពីមានសារចូលរួមរំលែកទុកពីតារាសិល្បៈមានដូចជា តារាកំប្លែងលោក ម៉ាដូណា និង តារាចម្រៀងលោក សាន ផានិត ជាដើម។
ក្នុងនោះ អតីតតារាចម្រៀងមនោសញ្ចេតនាលោក សាន ផានិត បានទម្លាយសារចែករំលែកទុក្ខលោក ឈុំ រតនា ដោយរៀបរាប់នូវអនុស្សាវរីយ៍ មានទាំងការទម្លាយថាសពធ្លាប់ជំពាក់បំណុលខ្លួនផងដែរ។
អតីតតារាចម្រៀងដែលបាត់ភាពល្បីយូរលោក សាន ផានិត បានសរសេរសារនោះថា៖ «Rip brother Rathana! សុំទោសដែលធ្លាប់ស្តីឲ្យប្អូនយកស្បែកជើងប្រេនបងម៉ាក Cucci ទិញពីNew Collection តម្លៃ $ ៤៥ អត់យកមកឲ្យបងវិញ កាលនៅបន្ទប់ជួលជាមួយគ្នា។ ហ៊ឺ!ទៅហើយម្តង១ៗ! មានតែអំពើល្អ និងខំថែសុខភាពទេ ដើម្បីរម្ងាប់អារម្មណ៍ ជីវិតដែលកំពុងតែបន្តសម្រាប់មនុស្សជាទីស្រឡាញ់របស់យើង ដែលត្រូវការយើងរស់រានដើម្បីពួកគាត់ឲ្យបានយូរបន្តិច៕
<figure>
<figcaption>រូបភាពបុណ្យសពតារាចម្រៀង ឈុំ រតនា បង្ហោះដោយប្អូនប្រុសលោក ឈុំ រ៉ូប៊ឺត។ រូបថត ហ្វេសប៊ុក</figcaption></figure>
Source www.postkhmer.com
Posted from my blog with SteemPress : http://khmernewsshare.com/archives/3485