ក្រុងតូក្យូ: ក្រឡេកមើលមួយភ្លែត រូបរាងកន្តុបដូចកូនឡានក្មេងលេង តែរថយន្ត អគ្គិសនី Daihatsu DN Pro Cargo នឹងក្លាយជាតម្រូវការដ៏ចាំបាច់សម្រាប់មនុស្សនាថ្ងៃអនាគត ពិសេសគឺស្ត្រី និងមនុស្សវ័យចំណាស់។
បង្ហាញរូបរាងក្នុងពិព័រណ៍រថយន្តក្រុងតូក្យូ កាលពីប៉ុន្មានសប្ដាហ៍មុននេះ រថយន្តគំរូ Daihatsu DN Pro Carg បានត្រៀមខ្លួនរួចជាស្រេចសម្រាប់ទីផ្សារជប៉ុន ម៉ាឡេស៊ី និងឥណ្ឌូនេស៊ី។ ប្រទេសជប៉ុនមានប្រជាជនចំណាស់ដ៏ច្រើន រីឯកំណើនប្រជាជនក្មេងៗក៏រួញខើចដោយសារអត្រាកំណើតទារកទាប និងអត្រាអាយុរស់រានមានជីវិតកើនឡើង។
មើលឃើញពីតម្រូវការនេះហើយទើប ក្រុមហ៊ុន Daihatsu បានបង្កើតរថយន្តទ្វារ ៤ រាងកន្តុប តែបរិវេណខាងក្នុងធំទូលាយ សមស្របសម្រាប់មនុស្សវ័យជរា និងស្ត្រី។ រថយន្ត Daihatsu DN Pro Cargo គឺជាប្រភេទយានប្រើថាមពលអគ្គិសនី ស័ក្ដិសមសម្រាប់នារី និងមនុស្សចាស់។ នៅផ្ទៃខាងក្នុងរថយន្ត មានភាពរាបស្មើ ធំទូលាយ អាចផ្ទុកអីវ៉ាន់បានច្រើន និងងាយកែកុនសម្រាប់តម្រូវការអាជីវកម្មខ្នាតតូចតាមចិត្តចង់។
នៅពេលដែលទ្វារកញ្ចក់ទាំងបួនរបស់វាបើកឡើង អ្នកដំណើរអាចដើរចូលបានយ៉ាងងាយ។ ទៅដល់ក្នុងរថយន្ត អ្នកដំណើរកម្ពស់ល្មមៗថែមទាំងអាចឈរបានទៀតផង ដោយសារកម្ពស់បាតរថយន្តទៅដំបូលជាង ១,៦ ម៉ែត្រ។
ក្រុមហ៊ុន Daihatsu បានអះអាងថា រថយន្តរបស់ខ្លួនមាន ២ កៅអីអង្គុយ ដោយទុកបរិវេណក្នុងរថយន្តទូលាយសម្រាប់ផ្ទុកអីវ៉ាន់ប្រើប្រាស់ប្រចាំថ្ងៃ ទំនិញសម្រាប់លក់ដូរ ឬក៏ច្នៃជាបន្ទប់ការិយាល័យចល័តផងដែរ។
<figure>
<figcaption>រថយន្តរាងកន្តុបបំពេញតម្រូវការមនុស្សស្រី ឬចាស់ជរា។ AFP</figcaption></figure>
តាមការពិត ជាមួយគំនិតក្នុងការបង្កើតរថយន្តបែបនេះ Daihatsu ធ្លាប់បានរំលេចជាយានជំនិះស្រដៀងគ្នាកាលពីឆ្នាំ ១៩៥៧។ កាលពីជំនាន់នោះ រថយន្ត Daihatsu ដែលមានរាងកន្តុប និងមានផ្ទៃខាងក្នុងធំទូលាយ បានដើរតួនាទីជាហាងចល័តសម្រាប់លក់ដូរទំនិញនានា ចាប់តាំងពីម្ហូបអាហារ រហូតដល់គ្រឿងសម្អាង។
សម្រាប់ម៉ូដែលថ្មីនេះ ក្រុមហ៊ុននៅតែរំពឹងថា៖ «រថយន្ត Daihatsu DN Pro Cargo ប្រើអគ្គិសនីនេះ នឹងក្លាយជាសម្លាប់របស់អតិថិជន ពិសេសគឺនារី មនុស្សចាស់ សម្រាប់ការរស់នៅ និងប្រកបរបរតូចតាចចិញ្ចឹមជីវិត។
គួរបញ្ជាក់ផងដែរថា សម្រាប់ឆ្នាំ ២០១៧ នេះ ក្រុមហ៊ុន Daihatsu បានប្រារព្ធខួប ១១០ ឆ្នាំរបស់ខ្លួន ខណៈនៅអំឡុងពាក់កណ្ដាលអាយុ ក្រុមហ៊ុននេះត្រឹមតែផ្គត់ផ្គង់គ្រឿងម៉ាស៊ីនតែប៉ុណ្ណោះ៕
Posted from my blog with SteemPress : http://khmernewsshare.com/archives/5936