Rihoen ka gadoeh, teuploeh meu kengkeung
Pageue ngoen beunteung, leukang peunula
Gaseh loen satoeh, takoeh dalam jeum
Han pat le peutheun, tanda seutia
Lam tarek uroe, ta cawoe neuheun
Harap keu udeung, tateumeu rasa
Rupa jieh lam croe, sagoe jieh ruhueng
Beukah duem beuneung, wab sipoet seuba
Gaseh ka abeh, beu that puteh preun
Nyang na meuteumeung, si bareh luka
Beu that hana deuh, weuh tateum peutheun
Ie mata bram bruem, tijoeh bak muka
Hana loen sangka, haba tasareung
Seuneupet ateung, jinoe ka bungka
Sayang blang raya, ka timoeh naleung
Padee han jeut tueng, tikoeh meucuca
Tanda seutia, nyata mangat kheun
Teubiet bak rukueng, mameh ban saka
Meuban tarasa, lidah teuh keueng
Babah teuh meutheun, lam seuketika
Ka geujoek laen, hai canden buleun
Euncien deungoen gleung, geuba keu tanda
Adak han tateum, meunan gata kheun
Loen tapeuraheung, bak ujoeng haba
Bak sang nyoe masa, sama ngoen jameun
Beuthat meukaleung, teurasa sama
Ka tan le beda, masa keureu'eun
Bak aneuk rinyeun, judoe poma ba
Keupue loem guna, haba talinteung
Meu'ah gata kheun, keu mangat rasa
Luka lam dada, nyata tatimpeung
Cuba ta peunyuem, kiban keuh rasa
Mangat ta mariet, meugriet uloen theun
Asoe ngoen tuleung, rapoeh teurasa
Mungken ciet ka niet, loen taneuk sinteung
Han tapreh reuneum, loen taneuk cuba
Rugoe duem masa, nyang ka tapeutheun
Thoen deungoen buleun, kalheh tasaba
Rupa jieh bisa, kalheh tabileung
Tapreh tasuleung, o'h katroek masa
Beuthat loen gusuek, teupluek bulei rhueng
Nyan manoek uteun, teutap di bungka
Beu that goet uruek, ta sipreuk pineung
Ngoen mata peudeung, banduem tahila
Loen pikee gata, seutia ureung
Dak leumah bayeun, han ciet tatuka
Meuban deuh teuka, sutra goep jak leung
Rukueng ka ceukeung, han deuh suara
Banduem ta reutek, hai lintek buleun
Ranteng ngoen cabeung, tababat rata
Awai ta asek, o'h goep ek rinyeun
Jinoe ka taleung, sampoe bak tika
Mungken ka takdir, meunoe ju takheun
Loen cuba peunyuem, deungoen loen saba
Lam istiqarah, surah ka meutheun
Laen meuteumeung, keu judoe gata
Do'a loen kirem, lam coet uroe khueng
Geulantoe ujeun, peulimboet jiwa
Nyang biet ta meucheun, beukeuh meuteumeung
Bek ek tabileung, rasa bahgia
Bek le ta ingat, mangat yoeh jameun
Bandum kabeh pleun, jinoe hai dinda
Bayang bek lewat, leugat ju taplueng
Gaseh ka ruhueng, ta anggap hana...
@andysabena