ကျွန်တော်က အိမ်ပွဲစား အိမ်အငှါး အိမ်အရောင်းတွေကို လိုက်ပြီး စီးပွါးဖြစ်လုပ်သူပါ ။ တစ်ရက်တစ်ရက် အိမ်ရှင် အိမ်ငှါး လိုက်ရှာရင်း အချိန်တွေ ကုန်တာများသည် ။ မိသားစုတွေ တစ်စုပြီးတစ်စု ရင်းနှီးလာတာလည်းများပြီ ဖြစ်သည် ။ ထိုထဲမှာ မှတ်မှတ်ရရ အိမ်အငှါးလိုက်ရှာပေးခဲ့ရသော မိသားစု တစ်ခုလည်း ရှိသည် ။
ထိုကာလက အငှါးပါးပြီး အလုပ်မဖြစ်သော အချိန်ကာလဖြစ်သည် ။ ထိုကြောင့် အမှတ်ရနေတာလည်း ပါသည် ။ သူတို့မှာ ထူးဆန်း၏ ။ အလွန်စကားနားထောင်သော မိသားစု ဖြစ်သည် ။ စကားနားထောင်သည်ဆိုသည်မှာ ကြိုက်သည် မကြိုက်သည်ကို မရှိ ကျွန်တော်ပြပေးသော နေရာတိုင်းကို အဆင်ပြေနေခြင်း ဖြစ်သည် ။
နောက်ဆုံး တိုက်ခန်းကောင်းကောင်းလေး တစ်ခု တွေ့သည် ။ရှေ့လမ်းလည်း ကျယ်သည် ပတ်ဝန်းကျင်လည်း ကောင်းသည် အရိပ် အာဝသ ကောင်းသော သစ်ပင်ကြီးများလည်းရှိသည် ။ ဤလောက်ကောင်းသော တိုက်ခန်းကို ကျွန်တော် မငှါးပေးနိုင်ပါ ။ ကျွန်တော်မိန်းမနဲ့ ကလေးအတွက်သာ ငှါးရမ်း ချင်သည် ။ ယခင်ငှါးရမ်းထားသောနေရာ က ဤနေရာလောက် မသာယာလှပါ ။ စာချုပ်ကလဲ ရက်စေ့လုနီးပြီဖြစ်သည် ။
ထို့ကြောင့် အကြံထုတ်ရပါတော့သည် ။ ထိုမိသားစုကလည်း ကျွန်တော့နောက်က ပါသည် ။ အထုတ်ကြီးတွေတော့မပါ ။ အဆင်ပြေရင် တစ်ခါထဲ နေတော့မည့် ပုံပါ ။ ထို့နောက် ကျွန်တော် စိတ်ကူးကောင်းလေး တစ်ခု ရသွားသည် ။ သူတို့ကို ကျွန်တော်ပြောလိုက်သည် ဟို တိုက်ဘေးကပ်ရပ် မျက်နှာစာက သစ်ပင်ကြီးက အစ်ကိုတို့ နေရမည့် နေရာပါ ။ ကျွန်တော်ပြောလိုက်သော စကားက အူကြောင်ကြောင်နိုင်မှန်းသိပါသည် ။ အဘယ်ကြောင့် ပြောမိမှန်းတောင် ကျွန်တော် မသိပါ ။
ဘယ်လိုလုပ် သစ်ပင်ပေါ်မှာနေမည်နည်း ။ ဤလူတွေ ဒေါသတော့ထွက်သွားမည် ထင်သွားသည် ။ သို့သော် သူတို့မိသားစုက အထွေအထူး မတုံ့ပြန်ပါ ။ ဝမ်းသာကြောင်းလည်း မပြ ။ ဝမ်းနည်းကြောင်းလည်း မပြ ။
ညနေ နေဝင်ခါနီး ကျွန်တော့ တိုက်ခန်းလေးက ပစ္စည်းပစ္စများ ရွေ့၍ ပြီးသွားသည် ။ ထိုအချိန်ထိ သစ်ပင်ရှေ့က မိသားစုကတော့ တစ်ဖဝါးမှ မရွေ့ပဲ ရပ်နေစဲ ပါ ။ တော်တော်လေး အူကြောင်ကြောင် နိုင်သော မိသားစုပါ ။ နေဝင်ပြီး သိပ်မကြာပါ ။ ထိုမိသားစုလည်း သစ်ပင်ပေါ်သို့ တက်သွားခဲ့သည် ။ ဘယ်လိုတက်သွားသည်ကို အသေးစိတ်မမြင်လိုက်မိပါ ။ သို့သော် သူတို့မိသားစု နေရာကောင်း ရသွားပြီ ဟု ကျွန်တော် ယူဆမိပါသည် ။
တစ်ရပ်ကွက်တည်း တစ်လမ်းတည်း နေသော်လည်း
ထိုအချိန်မှစ ကျွန်တော်လည်း ယင်းမိသားစုနဲ့ ထပ်စ်တော့ပါ ။